नांदेड : घरगुती गॅस वापरासाठी लागणाऱ्या सिलेंडरच्या किंमतीचा डिसेंबर महिन्यात शंभर रुपयाने भडका झाला आहे. याचबरोबर व्यावसायिक वापरासाठी लागणाऱ्या सिलेंडरच्या किंमतीतही वाढ झाली आहे. 

एकाच महिन्यात घरगुती गॅसच्या किमती वाढल्याने महिलांचे स्वयंपाक घराचे बजेट कोसळले आहेत. तर ग्रामीण भागातील बहुतांश लोक सिलेंडर खरेदीसाठी एवढी मोठी रक्कम देवून खरेदी करू शकत नसल्याने आजच्या घडीला ग्रामीण भागातील काहींच्या घरातील सिलेंडर शो पिस बनले आहे. परिणामी दरवाढीच्या भडक्याने पुन्हा एकदा घराघरातून चुली पेटू लागल्या आहेत.

हेही वाचा - कैद्याकडील मोबाईल प्रकरण : तुरुंग अधीक्षक नियंत्रण कक्षात, नांदेड कारागृहाची धूरा सोनुने यांच्यावर

सिलेंडर दरवाढीमुळे महिलांमध्ये असंतोष निर्माण झाला आहे. तर दुसरीकडे व्यावसायीक वापरासाठी लागणाऱ्या सिलेंडरच्या दरात वाढ झाल्याने या दरवाढीचा फटका त्यांना बसला आहे. आधीच कोरोनामुळे सर्वसामान्यांची आर्थिक घडी विस्कटली आहे. टाळेबंदीमुळे अनेकांचा रोजगार गेला आहे. अनेक बेरोजगार हे कामाच्या शोधात आहेत. अनेक जण तर पोटाची खळगी भरण्यासाठी व मिळेल ते काम करण्याची खुणगाठ बाळगून मुंबई, पुणे, नाशिक आदी मोठ्या गावांकडे धाव घेताना दिसून येत आहे. तर काही जण याआधीच आपले गाव सोडून तिकडे गेले आहे. 

हे देखील वाचा - नांदेड जिल्ह्यातील वाळूघाटांच्या लिलावाला अखेर मुहुर्त 

अशी बिकट परिस्थिती असताना सिलेंडर खरेदीसाठी एवढी मोठी रक्कम कुठून आणायची असा प्रश्न अनेकांसमोर निर्माण झाला असताना आता भरीसभर गॅस सिलेंडरच्या किमतीत तेही डिसेंबर महिन्यात शंभर रुपयाने वाढ झाली आहे. ३० नोव्हेंबर २०२० रोजी घरगुती सिलेंडरचे दर ६१४ रुपये होते. यात दोन डिसेंबर रोजी ५० रुपये तर १५ डिसेंबर रोजी ५० रुपये अशी एकूण शंभर रुपयांनी वाढ झाली आहे. 

येथे क्लिक कराच - संसाधने, मनुष्यबळाच्या वापरानेच ‘स्वारातीम’ यशोशिखरावर

डिसेंबर महिन्यात झालेल्या दरवाढीमुळे आता शहरातील सिलेंडर खरेदीसाठी ७१४ रुपये मोजावे लागत आहे. दुसरीकडे व्यावसायिक सिलेंडरचे दर सुमारे १०० रुपयाने वाढले असल्याची माहिती मिळाली आहे. याआधी हे व्यावसायिक सिलेंडर विकत घेण्यासाठी १३५० रुपये द्यावे लागत होते. आता १४५० रुपये मोजावे लागत आहे. याचा थेट फटका व्यावसायिकांना बसत असल्याने त्यांच्यामध्ये रोष व्यक्त केल्या जात आहे.