कुंडलवाडी : नांदेड जिल्ह्यातील १०२ रुग्णवाहिका चालकांची भरती ही बाह्य यंत्रणेकडून कंत्राटी पद्धतीने करण्यात आली असून त्या संबंधित संस्थेच्या कंत्राकदाराने गेल्या सात महिन्यांपासून रुग्णवाहिका चालताना वेतन न दिल्यामुळे ऐन दिवाळीच्या तोंडावर त्या चालकावर उपासमारीची वेळ आली आहे. त्यामुळे तत्काळ कंत्राटदाराकडून वेतन मिळून देण्यात यावे यासाठी जिल्हा शल्य चिकित्सक अधिकारी नांदेड यांना निवेदन देण्यात आले आहे.

नांदेड जिल्ह्यातील आरोग्य विभागात गेल्या अनेक वर्षापासून बाह्य यंत्रणेच्या माध्यमातून आरोग्य विभागातील पदे भरली जात आहेत. त्याच अनुषंगाने १०२ रुग्णवाहिका चालकांचीही भरती करण्यात आली, पण संबंधित संस्थेच्या कंत्राटदाराकडून मार्च ते सप्टेंबर २०२२ पर्यंतचे वेतन रुग्णवाहिका चालकांना अद्याप देण्यात आले नाही. त्यामुळे ऐन दिवाळी सणाच्या तोंडावर रुग्णवाहिका चालकांवर व त्यांच्या कुटुंबावर उपासमारीची वेळ आली आहे.

त्यामुळे संबंधित कंत्राटदाराकडून ता.२१ ऑक्टोंबरपर्यंत सर्व १०२ रुग्णवाहिका चालकाच्या खात्यावर थकीत वेतन जमा करून द्यावे, अन्यथा ता.२२ ऑक्टोंबर पासून सर्व १०२ रुग्णवाहिका चालक आपआपल्या कार्यरत ठिकाणी काम बंद ठेवण्यात येणार आहे. त्याचा परिणाम आरोग्य सेवेवर झाल्यास त्याची सर्वस्वी जबाबदारी संबंधित कंत्राटदार व प्रशासनाची असेल अशा आशयाचे निवेदन जिल्हा शल्य चिकित्सक अधिकारी यांना १०२ रुग्णवाहिका चालकांनी दिले आहे.