नायगाव : यंदा पाऊस चांगला झाल्याने सोयाबीन चांगले येईल. त्यावर मुलीचे लग्न करता येईल. काही शेतकऱ्यांनी कुडाचे छप्पर काढून पक्के बांधकाम करायचे ठरवले होते. परंतु, एका रात्रीत अतिवृष्टीमुळे मुरुडा नदी पूर आला. अन् असंख्य शेतकऱ्यांच्या स्वप्नांचा चक्काचूर झाला. शेतात पिकले, तेवढे मातीसह वाहून गेले. पशुधनही दगावले, आता पुन्हा संसार शुन्यापासून कसा उभा करायचा? अशी अवस्था नायगाव, पाडोळी, बोरगाव, रायगव्हाण या गावांतील नागरिकांची झाली आहे.

२७ सप्टेंबरच्या रात्री झालेल्या अतिवृष्टीने परिसरातील मुख्य नद्या व उपनद्यांना पूर आला. यात पिकांचे अतोनात नुकसान झाले. याच दिवशी रात्री अचानक मुरुडा नदीला मिळणाऱ्या नदीचे पाणी तुंबले. त्यामुळे नदी काठच्या शेतजमिनीसह ऊस व सोयाबीन पिकांचे नुकसान झाले. शिवाय नायगाव, पाडोळी, बोरगाव, रायगव्हाण या गावांची पिके काही दिवस पाण्यातच होती. तर नायगावच्या मनमत बेलगुरे यांनी पाच बॅगचे काढून ठेवलेल्या सोयाबीनचा ढीग वाहून गेला.

झालेल्या अतिवृष्टीमुळे सोयाबीनसह ऊस पिकाचे मोठे नुकसान झाले आहे. या उत्पन्नावर शेतकऱ्यांनी बाळगलेल्या स्वप्नांचा चक्काचूर झाला आहे. आता शासनाने तातडीने सरसकट मदत करावी, अशी मागणी परिसरातील शेतकरी करीत आहेत.

सलग तिसऱ्या वर्षी शेतातील सोयाबीन अतिवृष्टीमुळे बाधित झाले आहे. भावाच्या दवाखान्यासाठी झालेले खर्चातून आता सावरायची वेळ होती. सोयाबीनवर देणे देऊन मुलांचे शिक्षण करायचे ठरवले होते. पण, निसर्गाने सर्व काही नेले. आता उरले- सुरले सोयाबीनचे पीक चिखलात आहे.

-कल्याण पांचाळ, नायगाव

माझ्या शेतात सोयाबीनसह जमीन खरडून गेली आहे. त्यामुळे पीक तर गेलेच पण जमीनही नापिक झाली आहे. आता भविष्य अंधारात दिसत आहे.

-देविदास गोरे, शेतकरी