नांदेड : कंधार तालुक्यातील सावरगाव (नि) येथील नानाजी देशमुख कृषी संजीवनी प्रकल्प राबवताना कृषी सहाय्यकाकडून सहकार्य होत नसल्यामुळे त्यांची बदली करण्याची मागणी करत नानाजी देशमुख कृषी संजीवनी (पोखरा) प्रकल्पाच्या सूक्ष्म नियोजनावर बहिष्कार टाकत असल्याचे निवेदन सरपंच व ग्रामस्थांनी जिल्हाधिकाऱ्यांना दिले आहे.

कंधार तालुक्यातील सावरगाव (नि) येथे कृषी सहाय्यक संभाजी वडजे मागील तीन वर्षापासून कार्यरत आहेत. त्यांच्या कालावधीत शेतकऱ्यांच्या हिताच्या योजना राबविल्या नसल्याचे निवेदनात म्हटले आहे. नानाजी देशमुख कृषी संजीवनी प्रकल्प राबविताना सरपंच अर्चना मरडे यांनी प्रयत्न केले. यात अनेक शेतकऱ्यांच्या हिताच्या योजना आहेत, परंतु कृषी सहाय्यकाच्या सहकार्यामुळे एकही लाभ गावकऱ्यांना मिळाला नाही. या प्रकल्पात गाव शून्य आहे. वेगवेगळ्या कारणाने गावपातळीवर राजकारण करून शेतकऱ्यांना कोणत्याही योजनेचा लाभ कृषी सहायक मिळू देत नसल्याचे निवेदनात म्हटले आहे. यामुळे सरपंचासह गावकऱ्यांनी कृषी सहायक संभाजी वडजे यांची बदली करण्याची मागणी करत नानाजी देशमुख कृषी संजीवनी योजने अंतर्गत लोकसहभागीय सूक्ष्म नियोजनाच्या आराखड्यावर बहिष्कार टाकल्याचे निवेदनात म्हटले आहे.

हेही वाचा - विधायक बातमी : नांदेडच्या कुंभारवाडी नदीवरील लोकसहभागातून उभारलेल्या पुलाचे ज्येष्ठ नागरिकांच्या हस्ते लोकार्पण

जोपर्यंत बदली करुन नव्याने कृषी सहायकाची नेमणुक होणार नाही तोपर्यंत बहिष्कार कायम राहील, पोखरा कार्यक्रम निर्धारीत वेळेत राबविण्यात यावा, यास विलंब केल्यास सरपंच व गावकऱ्यांच्या वतीने साखळी उपोषण करण्यात येईल असा इशारा देण्यात आला आहे. निवेदनावर सरपंच अर्चना गोविंद मरडे, ग्रामपंचायत सदस्य, नानाजी देशमुख कृषी संजीवनी समिती सदस्य, महात्मा गांधी तंटामुक्त समिती अध्यक्ष, सेवा सहकारी सोसायटीचे माजी चेअरमन यासह ग्रामस्थांच्या स्वाक्षऱ्या आहेत.