नांदेड : जिल्ह्यातील शाळेत पोषण आहार योजनेंतर्गत अन्न शिजविण्यासाठी गॅस सिलिंडर मिळणार असल्याचा शासन निर्णय शिक्षण विभागात नुकताच प्राप्त झाला आहे. त्यानुसार जिल्ह्यातील दोन हजार ९९१ शाळा धुरमुक्त होणार आहेत. (Gas Cylinder For Schools Health Food)

केंद्र शासनाने ठरवून दिलेल्या प्रती दिन विद्यार्थीदरानुसार निधी उपलब्ध करून दिला जातो. केंद्र शासनाच्या शिल्लक निधीतून शालेय पोषण आहार योजनेंतर्गत जिल्ह्यातील पात्र तीन हजार ७३९ शाळांपैकी केंद्रीय स्वयंपाक गृहामार्फत आहार पुरविण्यात येणाऱ्या शाळा व सद्यस्थितीत गॅस कनेक्शन उपलब्ध असलेल्या शाळा वगळून दोन हजार ९९१ शाळांना गॅस सिलिंडर उपलब्ध होणार आहे.

प्रदूषण कमी करण्याच्या दृष्टीने शाळा चूल व धूरमुक्त करण्याचे धोरण असल्याने जिल्ह्यातील दोन हजार ९९१ शाळांमध्ये गॅस सिलिंडर मिळणार आहे. शाळेत चुलीवर स्वयंपाक तयार करण्यात येत असल्याने ही बाब लक्षात आल्यानंतर आता शासनाने गॅस सिलिंडर नसलेल्या शाळांची यादी शिक्षण विभागाकडून मागितली आहे.

सात वर्षांपूर्वीच आखली होती योजना

शासनाने चूल-धूरमुक्त अभियान राबवित शाळांना गॅस, सिलिंडर देण्याची योजना सुमारे सात वर्षांपूर्वी आखली होती. परंतु, अनेक शाळांना याचा लाभ मिळाला नाही. त्यामुळे आजही चुलीवर स्वयंपाक तयार करण्यात येतो. आता शासनाने गॅस, सिलिंडर नसलेल्या शाळांची यादी मागविली असून त्यांना गॅसचा पुरवठा करण्यात येणार आहे. त्यामुळे जिल्ह्यातील शाळा लवकरच चूल-धूरमुक्त होणार आहे.

जिल्ह्यातील शालेय पोषण आहार योजना सुरु असलेल्या दोन हजार ९९१ शाळांना गॅस सिलिंडरचा पुरवठा करण्यात येणार आहे. त्यामुळे लाकूड व अन्य इंधनामुळे होणारे प्रदूषण कमी होईल. शाळा चूल आणि धूरमुक्त होतील. येत्याकाही दिवसात शाळांना गॅस, सिलिंडर पुरवण्याबाबत कारवाई होईल.

- प्रशांत दिग्रसकर, शिक्षणाधिकारी, माध्यमिक.