मुदखेड : शहरातील राष्ट्रीय महामार्गालगत असलेल्या महाराष्ट्र ग्रामीण बँक शाखेचे अख्खे एटीएम मशीनच चोरट्यांनी पळविल्याची घटना घडली. त्यात १९ लाख १४ हजार रुपयांची रोकड होती. रविवारी मध्यरात्री २ वाजून १५ मिनिटांनी तीन-चार चोरट्यांनी एटीएम मशीन पळविल्याचे सीसीटीव्हीत दिसत आहे.

महाराष्ट्र ग्रामीण बँक शाखेतील एटीएम मशीनमध्ये शुक्रवारी वीस लाख रुपये जमा करण्यात आले होते. मशीन चोरी होताना त्यात एकोणीस लाख चौदा हजार पाचशे रुपये शिल्लक असल्याची माहिती बँक कर्मचाऱ्यांनी दिली.

चोरट्यांनी वापरलेले साहित्य जागेवरच ठेवून एटीएम उचलून नेले. श्वान पथक, गुन्हे शाखेचे विशेष पथक घटनास्थळी दाखल झाले होते. आजूबाजूच्या सीसीटीव्ही कॅमेऱ्यांची तपासणी केली असता यामध्ये अशोक लिलँड कंपनीची पिकअप गाडी यावेळेत एटीएमजवळ उभी असून तीन ते चार जण याठिकाणी असल्याचे सीसीटीव्हीमध्ये दिसतात. यानंतर पथकाने गावातील आजूबाजूच्या सीसीटीव्ही फुटेजची तपासणी केली.