नांदेड : अंगणवाडी कर्मचाऱ्यांना शासकीय कर्मचाऱ्यांचा दर्जा द्यावा, अंगणवाडी कर्मचाऱ्यांना पेंन्शन योजना सुरू करावी, योजनेच्या कामासाठी नवीन मोबाईल द्यावा, अमृत आहार योजनेच्या कामाचे थकीत मानधन द्यावे यासह इतर मागण्यांसाठी जिल्हा परिषद कार्यालयावर शुक्रवारी (ता. ११) अंगणवाडी कर्मचाऱ्यांनी छत्री मोर्चा काढून प्रशासनाचे लक्ष वेधले.

नांदेड जिल्ह्यातील सेविका, मदतनीस, मिनी अंगणवाडी सेविकांनी लाल रंगाची साडी परिधान करून सोबत छत्री घेऊन घेऊन मोर्चा काढला. हा मोर्चा राज्य अंगणवाडी कर्मचारी संघाच्यावतीने आयोजित केला होता. या वेळी एम. ए. पाटील, बृजपाल सिंह, शततारका काटकाडे आदी उपस्थित होते. मोर्चा झाल्यानंतर शिष्टमंडळाच्या वतीने एकात्मिक बाल विकासच्या उप मुख्य कार्यकारी अधिकारी रेखा काळम कदम यांना मागण्यांचे निवेदन देण्यात आले.