माहूर : शेतात स्प्रिंकलरचे पाइप जमा करताना अचानक वीज कोसळल्याने तालुक्यातील वझरा येथील एका १८ वर्षीय युवकाचा जागीच मृत्यू झाला. सदरील घटना सोमवारी (ता. १७) सायंकाळी पाच वाजता घडली.

माहूर येथून १५ किलोमीटर अंतरावर असलेल्या शेख फरीद वझरा येथे शेतात स्प्रिंकलरचे पाइप जमा करीत असताना आनंद तुकाराम मुंडे (१८) याच्या अंगावर वीज कोसळल्याने त्याचा जागीच मृत्यू झाला. या घटनेची माहिती मिळताच सरपंच दीपक केंद्रे, दत्त मांजरी येथील पोलिस पाटील रितेश केंद्रे, हरीश मुंडे, हनुमंत मुंडे, माजी सरपंच सुनील फड, प्रभू चोले, बालाजी केंद्रे यांनी तत्काळ घटनास्थळी धाव घेतली.

तसेच, माहूर पोलिस स्टेशनचे जमादार बाबू जाधव, तलाठी ए.व्ही. कुडमते यांनी भेट देऊन पाहणी केली व पंचनामा केला. सायंकाळी आठ वाजता माहूर येथील शासकीय ग्रामीण रुग्णालयात मृत आनंद मुंडे यांचा मृतदेह शवविच्छेदनासाठी आणण्यात आला. शहर व तालुक्यात सायंकाळी वातावरणात बदल झाला. जोरदार वाऱ्यासह विजांच्या कडकडाटात पावसाला सुरवात झाली असता ही घटना घडली. यामुळे वझरा गावावर शोककळा पसरली.