चिपळूण : राज्यात उष्णतेची लाट (Heat Wave) अतितीव्र झाल्याने विजेची मागणी तब्बल ५ हजार मेगावॉटने वाढली आहे. उकाड्याने हैराण झालेल्या जनतेने दिवसरात्र पंखे व कुलर सुरू ठेवल्याने हा भार महावितरणवर (Mahavitaran) पडला आहे. मे महिन्यात विजेची मागणी २४ हजार ८६० मेगावाॅटवर गेली आहे. वेळेत पाऊस झाला नाही, तर विजेची मागणी आणखी वाढण्याची शक्यता आहे.

त्या वेळी कोयना प्रकल्पातून (Koyna Dam Project) अतिरिक्त वीजनिर्मिती करण्याची वेळ येऊ शकते. राज्यात ज्या वेळी विजेची मागणी वाढली त्या त्या वेळी कोयना प्रकल्पातून अतिरिक्त वीजनिर्मिती करण्यात आली आहे. मागील सलग तीन वर्षे कोयनेतून अतिरिक्त वीजनिर्मिती (Power Generation) केली जात आहे. गेल्या वर्षी अतिरिक्त वीजनिर्मिती करण्यासाठी पाच टीएमसी पाणीसाठा वाढवून देण्यात आला होता. यावर्षी वीजनिर्मितीच्या कोट्यातील आठ टीएमसी पाणीसाठा कमी करण्यात आला आहे.

आठ टीएमसी पाणी सिंचनासाठी सोडले जात आहे. त्यानंतरही महिन्यात पुरेशी वीजनिर्मिती व्हावी, याचे नियोजन कोयना प्रकल्पाने केले आहे. राज्यात २२ हजार मेगावॉटइतकी विजेची गरज भासते. दरवर्षीच्या उन्हाळ्यात साधारणपणे १ हजार ते १२०० मेगावॉटइतकी अतिरिक्त वीज वापरली जात होती; मात्र, यंदाचा उन्हाळा महाउष्ण असल्याने कोकणसह मध्य महाराष्ट्र, या भागांत ही मागणी जवळपास दुपटीने वाढली आहे.

महानिर्मिती कंपनीच्या वरिष्ठ अधिकाऱ्यांकडून ज्या पद्धतीने सूचना येईल, त्या पद्धतीने वीजनिर्मिती केली जाईल. कोयना धरणातील अतिरिक्त पाणीसाठा विविध निर्मितीसाठी मिळाला तर याही वेळी अतिरिक्त निर्मिती करू.

-संजय चोपडे, मुख्य अभियंता, महानिर्मिती कंपनी, पोफळी

वीजनिर्मिती आणि उपलब्धता (मेगावॉट)

• एमएसपीजीएसएल थर्मल ७७८५

• एनटीपीसी ४४१४

• एपीएमएल २६०८

• जेएसडब्ल्यू २७०

• सीजीपीएल ५९०

• सोलार २५५८

• को-जनरेशन ३४९

• एमएसजीजीसीएल (गॅस) २६१

• आरआयपीएल १३३०

• पवनऊर्जा ४१२

• कोयना ८९३