बेळगाव - किरकोळ विषयावर सुवर्णसौध परिसरात आंदोलन करून परिसर वेठीस धरण्याचे प्रकार वाढले आहेत. त्यामुळे परिसरात आजपासून (ता. २४) एक महिना म्हणजे २३ ऑक्टोबरपर्यंत 144 कलम जारी करून जमावबंदीचा आदेश पोलीस आयुक्तांनी आज (ता.२४) बजाविला आहे. सुवर्णसौध हितदृष्टीने निर्णय घेण्यात आल्याचे स्पष्ट करून संघटना, संस्था किंवा व्यक्तीला आंदोलन करता येणार नसल्याचे स्पष्ट केले आहे.

हालगा-बस्तवाड परिसरात सुवर्णसौध असून, दक्षिण दिशेला मुख्य प्रवेशमार्ग आहे. प्रवेशमार्गापुढे पुणे-बेंगलोर राष्ट्रीय महामार्ग आहे. त्यावरून नियमित वाहतूक असते. त्याठिकाणी किरकोळ विषयावरून आंदोलन, निदर्शने व ठिय्या आंदोलन केल्यास वाहतुकीवर परिणाम होऊ शकते. यामुळे 144 कलम जारी करत निर्बंध घोषित केले आहे. आजपासून (ता.24) निर्बंध घोषित केले असून, 23 ऑक्टोबरपर्यंत कायम असेल. यासाठी सुवर्णसौध पुढे आंदोलनाला मज्जाव असेल. सातत्याने विविध संघटना नागरी समस्याबाबतचे विषय घेऊन सुवर्णसौध परिसरात आंदोलन करत आहेत. यामुळे वास्तूच्या सुरक्षेचा प्रश्‍न उपस्थित झाला आहे. यामुळे याबाबत महत्वाचा निर्णय घेऊन १४४ कलम पोलिस आयुक्तांकडून घोषित करण्यात आला आहे.

सुवर्णसौध परिसरात निर्बंध का?

* पुणे-बंगलोर राष्ट्रीय महामार्गावरून नियमित भरधाव वाहतूक

*आंदोलकांमुळे महार्गावरून जीवनावश्‍यक वस्तूंची वाहणुकीवर परिणाम होण्याची भिती

* सुवर्णसौधमध्ये विविध २४ कार्यालय असून, कार्यालयाचे कामकाज चालविणे अवघड

* शहरात महत्वाचे रुग्णालये असून, रुग्णांची ने आण किंवा वैद्यकीय उपचारावर परिणाम होण्याची भिती

* सुवर्णसौध परिसरात हालगा-बस्तवाड, के. के. कोप्पसह विविध गावे भाषेच्या विषायवर संवेदनशिल आहेत.