विटा : येथील तहसील कार्यालयात तालुकास्तरीय लम्पी स्कीन नियंत्रण समितीची सभा तहसीलदार ऋषिकेत शेळके यांच्या अध्यक्षतेखाली झाली. गटविकास अधिकारी संदीप पवार, सहायक पशुसंवर्धन आयुक्त डॉ. एम. बी. गवळी, पशुधन विकास अधिकारी डॉ. एस. के. मणेर, पोलिस निरीक्षक संतोष डोके, बाजार समिती सचिव प्रकाश जाधव उपस्थित होते.

लम्पी चर्मरोग संनियंत्रण समिती सदस्य गवळी व डॉ. मणेर यांनी याविषयी माहिती दिली. डॉ. गवळी यांनी लक्षणे सांगितली. प्रतिबंधात्मक उपाय म्हणून जनावरांचे गोठे व त्या लगतच्या परिसरामध्ये डास, गोचीड, माशा यांच्या नियंत्रणासाठी औषध फवारणी करण्याच्या सूचना देण्यात आल्या.

तहसीलदार शेळके यांनी जनावरांचे बाजार, प्रदर्शन व शर्यती आयोजित करण्यास मनाई केल्याचे सांगितले. ‘लम्पी’ची लक्षणे जनावरांत आढळून आल्यास पशुवैद्यकीय दवाखान्याशी संपर्क करावा, असे आवाहन तालुकास्तरीय लम्पी चर्मरोग सनियंत्रण समितीच्या वतीने करण्यात आले.