जत : जत - विजापूर जाणाऱ्या राष्ट्रीय महामार्गावर मॉर्निंग वॉकला जाऊन घरी परतत असताना एका दाम्पत्याला भरधाव वेगाने येणाऱ्या कंटेनरने मागून धडक दिली. त्यात पतीचा जागीच मृत्यू झाला, तर पत्नी गंभीर जखमी झाली. सतीश गेनाप्पा शिंदे (वय ३६, सातारा रस्ता, जत) असे मृताचे नाव असून गुरुवारी (ता. २७) रोजी पहाटे ५.४५ वाजण्याच्या सुमारास ही घटना घडली.

या दाम्पत्याने मॉर्निंग वॉकला जायचे म्हणून आज सुरुवात केली. मात्र, काळाने घाला घातला. या घटनेने जत शहरात हळहळ व्यक्त करण्यात येत होती. घटनेनंतर कंटेनर चालक पसार झाला. रात्री उशिरापर्यंत जत पोलिस ठाण्यात घटनेची नोंद झाली नव्हती.

पोलिसांकडून व घटनास्थळी मिळालेली माहिती अशी, की सतीश शिंदे यांचा सातारा रस्त्यावर निगडी कॉर्नर शेजारी लॉन्ड्रीचा व्यवसाय आहे. बऱ्याच दिवसापासून सकाळी फिरायला जायचे म्हणून दाम्पत्याकडून विचार सुरू होता. गुरुवारी तो योग आला. सकाळी ५ वाजता दोघेही येथील विजापूर गुहागर राष्ट्रीय महामार्गवरील विजापूर रस्त्याच्या दिशेने चालत जाऊन घरी परत येत होते.

दरम्यान, शहरातील तांबोळी दवाखान्याजवळ आले असता विजापूरहून साताऱ्याच्या दिशेने निघालेल्या कंटेनरने (एम. एच. १३ डी. क्यू. ७३७१) रस्त्याच्या शेजारी असणाऱ्या सतीश व त्यांच्या पत्नीला मागून जोराची धडक दिली. सतीश रस्त्यावर अदळले. त्यातच त्यांचा मृत्यू झाला. नागरिकांनी तत्काळ दवाखान्यात दाखल केले. मात्र, तो मृत असल्याचे डॉक्टरांनी सांगितले. पत्नीही गंभीर जखमी असून तिच्यावर खासगी दवाखान्यात उपचार सुरू आहेत. घटनेनंतर कंटेनर चालक पसार झाला असून त्याचा तपास जत पोलिस करत आहेत.