Dhalewadi : आजकालच्या जमान्यात लग्न, गावदेव, वरात म्हटले की डीजे, साऊंड सिस्टिम, फटाक्यांची आतषबाजी, साऊंड सिस्टिमसमोर नाचगाण्याचा कार्यक्रम प्रामुख्याने असतो. मात्र, याला फाटा देत ढालेवाडी (ता. कवठेमहांकाळ) येथील चव्हाण कुटुंबीयांनी वारकरी संप्रदायाची परंपरा आपल्या मुलाच्या लग्नात जपण्याचा एक आदर्श प्रयत्न केला.

ढालेवाडी येथील राहुल एकनाथ चव्हाण यांचा विवाह शनिवारी (ता. १४) पार पडला. गेले तीन-चार पिढ्यांपासून वारकरी संप्रदायात असणारे हे कुटुंब आहे. चव्हाण यांनी मुलाचे लग्न पार पडल्यानंतर काढली जाणारी वरात सांप्रदायिक पद्धतीने अतिशय भक्तिमय वातावरणात गावातून काढली.

टाळ, वीणा, भजन, तुळशी वृंदावन अशा वातावरणात फुगडी खेळत वरात करण्यात आली. कृष्णा महाराज ढालगावकर, मराठे महाराज चोरोचीकर व कृष्णा पाटील महाराज करोली टी यांच्या मार्गदर्शनातून अतिशय भक्तिमय वातावरणात जणू काही दिंडी सोहळा पार पडला. विवाह सोहळ्यानंतर नवदाम्पत्याची गावातून वरात काढण्यात आली. परंतु अतिशय मंत्रमुग्ध करणारा आणि धार्मिक सोहळा वाटावा अशा पद्धतीने गावप्रदक्षिणा, करत दिंडी काढण्यात आली.

‘राम कृष्ण हरी, विठ्ठल रुक्माई...’, ‘ज्ञानदेव तुकाराम...’ नामाच्या गजरात आणि टाळ मृदंगाच्या तालावर वराती मंडळी मंत्रमुग्ध झाले होते. फटाके आणि गुलाल यांच्याऐवजी नवरा-नवरी आणि वऱ्हाडी मंडळींच्या अंगावर फुलांचा वर्षाव करण्यात आला. त्यामुळे संपूर्ण गावभर जणू पंढरीची वारी गावात अवतरली असल्याचे वातावरण तयार झाले होते. वरातीनंतर रात्री हेमंत मराठे महाराज चोरोचीकर यांचा कीर्तनाचा कार्यक्रम आयोजित करण्यात आला होता.