आरग ( मिरज) : बेडग (ता. मिरज) येथील गावात भटक्या मोकाट पिसाळलेल्या कुत्र्याने अक्षरश: उच्छाद मांडला आहे. रविवार व सोमवार या दोन दिवसांत एकाच पिसाळलेल्या कुत्र्याने सुमारे वीस जणांना चावा घेतला. पाळीव प्राण्यांसह देशी पाडीवरही कुत्र्याने हल्ला केला. येथील बिंदले कुटुंबातील एक वर्षीय लहान बाळाच्या मानेवर व आईवर कुत्र्याने चावा घेतला. त्यामुळे परिसरात पिसाळलेल्या मोकाट कुत्र्याची मोठी दहशत निर्माण झाली आहे. परिणामी, नागरिकांच्यात भीतीचे वातावरण निर्माण झाले आहे. या मोकाट कुत्र्यांचा ग्रामपंचायतीने बंदोबस्त करावा, अशी मागणी नागरिकांतून होत आहे. (dog-bit-about-twenty-people-in-sangli)

येथील मंगसोळी रस्त्यांवरील खांडेकर- कोरे वस्तीत १२ जणांना तर गावातील गावठाण हद्दीत ८ जणांना कुत्र्याने चावा घेत अक्षरशः धुमाकूळ घातला आहे. यात चार वृद्ध व्यक्तिंचा समावेश आहे. मंगसोळी रस्त्यांवरील आरोही काशिनाथ शेळके (वय ३) व शिवानी काशिनाथ शेळके (वय ८ ) ही समोरील अंगणात खेळत असताना पिसाळलेल्या कुत्र्याने त्यावर हल्ला करत शरीराचा चावा घेतला. घरातील व्यक्ती त्यास कुत्र्याच्या तावडीतून सोडवून दवाखान्यात दाखल केले.

हेही वाचा- रत्नागिरीत तीन बालकांची कोरोनाच्या डेल्टा प्लस व्हेरियंटवर मात; जिल्हा शल्य चिकित्सकांची माहिती

मात्र, आरग बेडग येथील सरकारी रुग्णालयात उपचाराची सोय नसल्याने त्यांना सांगली येथील शासकीय रुग्णालयात पाठविण्यात आले. त्यानंतर सोमवारी सकाळी पुन्हा गावातील गावठाण हद्दीत आठ जणांना पिसाळलेल्या कुत्र्याने चावा घेतला. बेडग येथे गेल्या काही दिवसांपासून बेवारस व मोकाट कुत्र्यांची मोठी संख्या वाढली आहे. गावातील व वाडी वस्तीवरील जाणाऱ्या नागरिकांवर हल्ले करतात. एकट्या दुकट्या लहान मुलाला खेळताना किंवा रस्त्याने जाताना गाठून चावा घेतात.