बेळगाव : ग्रामपंचायत निवडणुकीसाठी शुक्रवारी (११) अर्ज भरण्याच्या शेवटच्या दिवशी तब्बल ८,७६७ जणांनी उमेदवारी अर्ज केले. त्यामुळे, सात तालुक्‍यांत एकूण १५,८०८ अर्ज दाखल झाल्याचे स्पष्ट झाले. पहिल्या दोन दिवसांत अर्ज भरणा प्रक्रिया संथ होती; मात्र शेवटच्या तीन दिवसांत मोठ्या प्रमाणावर अर्ज दाखल झाले आहेत.
अर्ज भरणा प्रक्रियेला सोमवारपासून (७) सुरवात झाली होती. पहिल्या दिवशी ६२ जणांनी उमेदवारांनी अर्ज केले होते. मंगळवारी (८) २४४ जणांनी अर्ज दाखल केले होते. बुधवारनंतर (९) अर्ज भरण्याच्या प्रक्रियेला वेग आला. यादिवशी १,५५७ जणांनी अर्ज दाखल केले. तर गुरुवारी (१०) उच्चांकी ५,१७८ उमेदवारांनी अर्ज केले. मात्र, हा उच्चांक शेवटच्या दिवशी मोडीत निघाला.
शेवटच्या दिवशी अर्ज भरण्यासाठी झुंबड उडाली होती. शुक्रवारी अर्ज दाखल करण्याचा शेवटचा दिवस होता. यामुळे इच्छूक उमेदवार, सूचक आणि त्यांच्या समर्थकांनी आपापल्या ग्रामपंचायत कार्यालयासमोर मोठी गर्दी केली होती. एकूण ८,७६७ जणांनी अर्ज दाखल केले. शेवटच्या दिवशी बेळगाव तालुक्‍यातून सर्वाधिक १,८८२ अर्ज दाखल झाले. तर खानापूर- १,५०१, हुक्केरी- १,८००, बैलहोंगल - ७३०, कित्तूर - ४६७, गोकाक - १,५६१, मुडलगी - ८२६ असे अर्ज दाखल झाले. सात तालुक्‍यातील २५९ ग्रामपंचायतींसाठी एकूण १५,८०८ जणांचे अर्ज दाखल झाले आहेत.
शनिवारी (१२) अर्जांची छाननी झाली. मात्र, वैध ठरलेल्या अर्जांची आकडेवारी रात्री उशीरापर्यंत मिळू शकली नाही. सोमवारी (१४) अर्ज माघार घेण्याचा शेवटचा दिवस आहे. त्यानंतरच प्रत्येक ग्रामपंचायतीतील लढतींचे चित्र स्पष्ट होणार आहे. पहिल्या टप्प्यातील मतदान २२ रोजी होणार आहे. यामुळे उमेदवारांनी प्रचारासाठी आतापासूनच रणधुमाळी उडविलेली आहे. तालुक्‍यातील वातावरण ग्रामपंचायत निवडणुकीमुळे ढवळून निघाले आहे. गावागावातून केवळ निवडणूक आणि उमेदवार तसेच जय-पराजय याचीच चर्चा सुरू आहे.
हेही वाचा - बेळगावकर आता मास्क घालाच, नाहीतर होईल कारवाई -
जोरदार शक्‍तिप्रदर्शन
यंदा ग्रामपंचायत निवडणुकीसाठी विक्रमी अर्ज दाखल झाले आहेत. उमेदवारांनी अर्ज भरतानाच शक्‍तिप्रदर्शन करून प्रतिस्पर्ध्यांवर दबाव टाकण्याचा प्रयत्न केला. त्यामुळे, प्रचारही झंझावाती होणार असल्याचे दिसून आले. अनेकजण साम, दाम, दंड, भेदाचा वापर करुन जिंकण्यासाठी सज्ज झाले आहेत.
संपादन - स्नेहल कदम
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.