पंढरपूर : पंढरीतील हरीओम सोसायटी मधील रहिवासी बालरोग तज्ञ डॉ.सुधीर आसबे व त्यांच्या सुविद्य पत्नी डॉ.ज्योती आसबे यांनी आपल्या घरी शालेय साहित्याचा वापर करून श्री गणेश मूर्तीची इको फ्रेंडली सजावट केली आहे. ही सजावट पाहण्यासाठी हरिओम सोसायटी सह आसपासच्या नगरातील बाल गणेश भक्तांसह त्यांच्या पालकांची गर्दी होत आहे.

डॉ.आसबे यांच्या घरी दरवर्षी गणेश मूर्ती समोर केलेली संपूर्ण सजावट ही इकोफ्रेंडली असते. यंदा देखील आसबे दांपत्याने बुद्धीची देवता असणाऱ्या गणपती समोर सजावट करताना शालेय साहित्याचा वापर अतिशय कल्पकतेने केला आहे.

स्केच बुक, वही, पेन, सिसपेन्सिल, खोड रबर, फुटपट्टी, स्केच पेन इत्यादी साहित्याचा कल्पक पद्धतीने वापर करत सुंदर सजावट केली आहे. फुलस्केप वही व छोट्या वहयांचा वापर करून गणपती बाप्पाची बैठक व्यवस्था करण्यात आलेली आहे. शालेय साहित्याचा वापर करून साकारण्यात आलेली ही सजावट संपुर्णपणे इकोफ्रेंडली आहे.

या सजावटीच्या माध्यमातून शैक्षणिक संदेश तर दिला जात आहेच परंतु सामाजिक बांधिलकी म्हणून गणेश विसर्जना नंतर सजावटीसाठी वापरण्यात आलेले संपूर्ण शालेय साहित्य हे गरजू शालेय विद्यार्थ्यांना वाटप करणार असल्याचे डॉ.ज्योती आसबे यांनी 'सकाळ' शी बोलताना सांगितले. आसबे कुटुंबीयांनी आपल्या इकोफ्रेंडली गणेश सजावटीतून समाजासमोर एक उत्तम उदाहरण निर्माण केले आहे.

त्यांच्या कल्पनेचे, कलाकृतीचे व सामाजिक उपक्रमाचे सर्व स्तरातून कौतुक होत आहे. * दरवर्षी श्रीगणेश सजावटीतून आम्ही समाजाला काही प्रबोधनात्मक संदेश देण्याचं प्रयत्न करत असतो. हा संदेश देत असताना सजावटीतून पर्यावरणाला कोणतीही हानी होणार नाही याची देखील काळजी घेत असतो.- डॉ.सुधीर आसबे, बालरोग तज्ञ, पंढरपूर