पारनेर : दिल्लीतील निर्भया अत्याचार व खून प्रकरणातील चारही आरोपींना पतियाळा न्यायालयाने 22 जानेवारी रोजी फाशी देण्याचा निर्णय दिला. मात्र, आपण आताच मौन थांबविणार नाही. निर्भयाच्या आरोपींना फाशी होत नाही, तोपर्यंत आपण मौनावर ठाम असल्याचे ज्येष्ठ समाजसेवक अण्णा हजारे यांनी आज पुन्हा एकदा स्पष्ट केले. 

हेही वाचा - राष्ट्रीय बॅडमिंटनचे सांघिक विजेतेपद महाराष्ट्राला 

निर्भयाच्या गुन्हेगारांना फाशीची शिक्षा झाल्याने जनतेचा, महिलांचा न्याय व्यवस्थेवरील विश्वास दृढ होईल, असे सांगत हजारे यांनी देशाचे संविधान सर्वोच्च असल्याचेही लेखी प्रतिक्रियेत म्हटले आहे. आपला देश कायद्याच्या आधारे चालतो. निर्भया प्रकरणात न्यायालयाने 2013मध्येच आरोपींना फाशीची शिक्षा सुनावली होती. परंतु सात वर्षांत त्या शिक्षेची अंमलबजावणी झाली नाही. पतियाळा न्यायालयाने आज आरोपींच्या फाशीच्या शिक्षेची तारीख व वेळ जाहीर करून जनतेच्या मनात पुन्हा एकदा विश्वास निर्माण केला आहे. न्याय व्यवस्थेत "देर है लेकिन अंधेर नही' असे हजारे यांनी म्हटले आहे. 

मरणाची भीती प्रत्येकालाच

लेखी संवादात अण्णा हजारे म्हणतात, ""निर्भया प्रकरणात गुन्हेगारांना फाशीची शिक्षा सुनावल्याने महिलांवर अन्याय, अत्याचार करणाऱ्यांवर धाक निर्माण होईल. अन्याय करणारे आरोपी गुंड प्रवृत्तीचे असले, तरी प्रत्येकाला मरणाची भीती असतेच. देशात अशा अनेक पीडित निर्भया आहेत, त्यांनाही लवकरच न्याय मिळेल.'' 

हेही वाचा- 76 गावांतील पाणीनमूने दूषित 

आंदोलनाचा 19वा दिवस

निर्भया प्रकरणातील आरोपींना लवकरात लवकर फाशीची शिक्षा द्यावी, महिला अत्याचाराच्या घटनेचा तपास तातडीने करावा, महिलांसाठी राष्ट्रीय पातळीवरील "हेल्पलाइन' सुरू करावी, महिला अत्याचाराच्या घटनांचा तपास महिला अधिकाऱ्यांनीच करावा, आदी मागण्यांसाठी हजारे यांनी 20 डिसेंबर 2019 पासून राळेगणसिद्धी येथील संत यादवबाबा मंदिरात मौन आंदोलन सुरू केले आहे. या मौन आंदोलनाचा आजचा 19वा दिवस होता. पतियाळा न्यायालयाने निर्भयाच्या आरोपींना 22 जानेवारी रोजी सकाळी सात वाजता फाशी देण्याची शिक्षा जाहीर केली. मात्र, त्यानंतरही अण्णा हजारे आपल्या मौन आंदोलनावर कायम होते. शिक्षेची अंमलबजावणी झाल्यावरच आंदोलन मागे घेणार असल्याचे त्यांनी स्पष्ट केले आहे.