जत - भाजपचे माजी नगरसेवक विजय ताड यांची भरदिवसा निर्घृणपणे हत्या झाली. या घटनेला महिना होत आला, तरी यातील मुख्य सूत्रधार उमेश सावंत याला पकडण्यात पोलिसांना यश आलेले नाही. ही बाब कुटुंबीयांसाठी संशयास्पद वाटत आहे. त्यामुळे यंत्रणा न्याय देईल की नाही, अशी शंका वाटत आहे. तेव्हा हा तपास सीआयडी किंवा एसआयटीकडे देण्यात यावा, अशी मागणी ताड यांचे बंधू विक्रम ताड यांनी पत्रकार बैठकीत केली आहे.

शिवाय, याबाबत आपण मुख्यमंत्री, उपमुख्यमंत्री व पोलिस महासंचालकांकडेही दाद मागणार असल्याचे त्यांनी स्पष्ट केले.

विक्रम ताड म्हणाले, माजी नगरसेवक विजय ताड यांचा १७ मार्च रोजी गोळ्या झाडून व दगडाने ठेचून निर्घृणपणे खून केला होता. या खुनानंतर पोलिसांनी चार संशयितांना तात्काळ अटक केली आहे. त्यांनी खुनाची कबुली देऊन सुपारी घेऊन हा खून केल्याचे सांगितले आहे. शिवाय, पहिल्या दिवशीच यात मुख्य सूत्रधार हा उमेश सावंतच असल्याचे आमचेही म्हणणे होते. त्यानुसार तपासातही स्पष्ट झाले आहे. असे असताना आज महिना झाला तरी सूत्रधार सावंत पसार आहे. यामागे काहीतरी काळेबेरे असण्याची शक्यता आता बळावत आहे. एक महिना होत आला तरी पोलिसांना संशयित मिळत नाही किंवा त्या ताकदीने तपास यंत्रणा काम करत नाही.

विक्रम ताड म्हणाले, आमची अशी मागणी आहे की, पोलिसांनी त्यास सहकार्य करणारे, संबंधित राजकीय व्यक्ती, निकटवर्तीय यांची कसून चौकशी केल्यास संशयिताचा शोध ताडतीने लागू शकतो. परंतु, पोलिस यात असे काहीच करत नाहीत.

शिवाय, हा संशयित अनेक गुन्ह्यात आहे. तो गुन्हेगारी प्रवृत्तीचा आहे. त्याच्यावर व त्याच्या टोळीवर ‘मोक्का’ लावण्यात यावा. दरम्यान, संशयित सावंत याला अटक न झाल्यास आत्मदहन करण्याचा इशारा दिला होता. मात्र, पोलिसांनी आठ दिवसांत त्याला अटक करू, असे सांगून आम्हास थांबवले आहे, तरी अद्याप तपास होत नाही. भलेभले आरोपी एका दिवसात पोलिसांना मिळतात. मात्र हाच मिळत नसल्याने कुटुंबीयांमध्ये भीतीचे वातावरण आहे. आजही आमचे कुटुंबीय एका दहशतीखाली वावरत आहे. त्यामुळे आता त्यास अटक न केल्यास आम्हाला टोकाचा निर्णय घ्यावा लागेल, ज्याला सर्वस्वी पोलिस यंत्रणा जबाबदार असेल, असेही ताड यांनी स्पष्ट केले. यावेळी किरण शिंदे, कृष्णा कोळी उपस्थित होते.