निपाणी (बेळगाव) : मामाच्या गावी निपाणी येथे आलेल्या कोल्हापूर येथील शाळकरी विद्यार्थ्याचा(Kolhapur student)विहिरीत बुडून मृत्यू झाला. मंगळवारी (ता. 8) सकाळी उघडकीस ही घटना आली. रणवीर दीपक सूर्यवंशी (वय 15 रा. महाराणा प्रताप चौक, कोल्हापूर) असे मृत विद्यार्थ्याचे नाव आहे. या घटनेची नोंद शहर पोलिस ठाण्यात झाली आहे.kolhapur-student-died-in-nipani-crime-marathi-news

गेल्या महिन्यापूर्वी रणवीर हा आपले मामा सुभाष चव्हाण (साळुंखे गल्ली, निपाणी) यांच्या घरी आला होता. मंगळवारी (ता. 8) सकाळी तो आणि सुभाष यांचा मुलगा प्रथमेश यांच्यासमवेत घरापासून काही अंतरावर असलेल्या श्रीमंत निपाणकर-सरकार वाड्यातील विहिरीवर (कुंडामध्ये) पोहोण्यासाठी गेले होते.

प्रथमेश व रणवीर हे दोघेजण इनरच्या साह्याने पोहू लागले. यावेळी रणवीर विहिरीत बुडाला. घाबरून प्रथमेशने घराकडे धाव घेत याची माहिती कुटुंबीयांना दिली. त्यानुसार तातडीने चव्हाण परिवारांसह नगराध्यक्ष जयवंत भाटले, श्रीमंत दादाराजे देसाई-निपाणकर, सामाजिक कार्यकर्ते सुनील शेलार यांच्यासह काही नगरसेवकांनी घटनास्थळाकडे धाव घेतली. यावेळी रणवीर हा पाण्यात खोल बुडाल्याचे लक्षात आले. याबाबतची माहिती निपाणी शहर पोलिसांना दिली. यावेळी घटनास्थळी शहर पोलिस ठाण्याचे उपनिरीक्षक अनिलकुमार कुंभार यांच्यासह हवालदार बसवराज नावी, एस. एस. चिकोडी, संदीप गाडीवड्डर यांनी भेट देऊन पाहणी केली. यावेळी रणवीर हा खोलवर बुडाल्याचे लक्षात आले. त्यानुसार कोल्हापूर येथील जीवरक्षक दिनकर कांबळे यांना पाचारण करण्यात आले. दुपारी कांबळे यांनी सुमारे शंभर फूट खोल विहिरीत बुडालेला रणवीर याचा मृतदेह बाहेर काढला. दुपारी येथील सरकारी महात्मा गांधी रुग्णालयात मृतदेहाचे शवविच्छेदन करून नातेवाईकांच्या ताब्यात दिला. निपाणी शहर पोलिस ठाण्यात घटनेची नोंद झाली आहे.

हेही वाचा- संभाजीराजेंच्या हाकेला साद; सकल मराठा समाज राजेंच्या पाठिशी

कुटुंबीयांसह नातेवाईकांचा आक्रोश

मयत रणवीर विहिरीत बुडाल्याने त्याची माहिती कुटुंबीयांसह अनेक नातलगांना समजली. त्यामुळे सर्वांनी विहिरीभोवती गर्दी केली होती. अथक परिश्रमानंतर मृतदेह बाहेर काढल्यावर कुटुंबीय व नातेवाईकांनी एकच आक्रोश केला. हे दृश्य पाहून सर्वांनी हळहळ व्यक्त केली.