गडहिंग्लज (कोल्हापूर) : येथील मार्केट यार्ड परिसरात आज सायंकाळी सातच्या सुमारास वीजवाहिनीचा शॉक लागून चिमुकल्याचा जागीच मृत्यू झाला. बसवराज दत्ता जाधव (वय ८) असे त्याचे नाव आहे. या घटनेने शहरात हळहळ व्यक्त होत आहे.

याबाबतची माहिती अशी 

जाधव कुटुंबीय मेटाचा मार्ग परिसरात राहते. तेथून मार्केट यार्ड परिसरात येण्यासाठी पायवाट आहे. मार्केट यार्ड परिसरातील गोठ्यात दूध आणण्यासाठी बसवराज सायंकाळी येत होता. दरम्यान, पावसात वीजवाहिनी तुटून पडली होती. ते बसवराजच्या लक्षात आले नाही. चालत येत असताना त्याचा वाहिनीला स्पर्श होताच जोराचा धक्का बसला आणि तो लांब फेकला गेला. ही घटना सोबत असणाऱ्या मुलाने पाहून घरी जाऊन सांगितली.

हेही वाचा- ‘चंद्रकांत पाटील यांना सहकार, महसूल, सार्वजनिक बांधकाम खाते समजलेच नाही' -

लोकांनी घटनास्थळी येऊन बसवराजला लाकडाच्या सहाय्याने बाजूला केले व दवाखान्यात नेले; परंतु तत्पूर्वीच त्याचा मृत्यू झाला होता. त्याच्या आईने आक्रोश केला. बसवराज सावित्रीबाई फुले विद्यालयात दुसरीत शिकत होता. वडील हॉटेल कामगार असून, आई मोलमजुरी करते. त्याला भाऊ आहे. रोजगारासाठी हे कुटुंब बाहेरून येऊन येथे राहिल्याचे सांगण्यात आले. दरम्यान, रात्री उशिरापर्यंत घटनेची नोंद पोलिसांत सुरू होती. विच्छेदन करून मृतदेह रात्री उशिरा नातेवाइकांच्या ताब्यात देण्यात आला.

संपादन -अर्चना बनगे