राशिवडे बुद्रुक (कोल्हापूर) : येळवडे -राशिवडे (ता.राधानगरी) या रस्त्यादरम्यान दुचाकीस्वार आणि टेम्पोची धडक होऊन एकजण जागीच ठार झाला. शिवाजी दत्तात्रय कुलकर्णी (वय 56 रा. पुंगाव ) असे मृत व्यक्तीचे नाव आहे. आज सकाळी दहाच्या सुमारास ही दुर्घटना घडली. गावापासून जवळच असलेल्या दत्त मंदिरा शेजारी सारजाई नावाच्या ओढ्यावर हा अपघात झाला.

घडलेली घटना अशी, सकाळी कुलकर्णी हे घरगुती गॅस सिलेंडर आणण्यासाठी दुचाकीवरुन राशिवडेकडे निघाले होते. त्याच दरम्यान राशिवडे येथील मालवाहू टेम्पो येळवडेच्या दिशेने पुढे चालला होता. याचवेळी दुचाकी टेंपोच्या पुढच्या चाकाला धडकल्याने पाय मोडून कुलकर्णी यांचे डोके टेंपोच्या बाजूपट्टीवर जोरात धडकल्याने त्यांचा जागीच मृत्यू झाला. यावेळी अंमलदार गणेश पाटील, अरविंद पाटील यांनी पंचनामा करुन वाहने ताब्यात घेतली.

हेही वाचा - गायत्री पुढे जाताच मागून किंकाळ्या ऐकू आल्या, फिरुन पाहिले तर मैत्रिण झेलत होती तलवारीचे वार -

अचानक घडलेल्या घटनेमुळे त्यांच्या कुटुंबावर शोककळा पसरली. वर्षाखेरीच्या दिवशी झालेल्या अपघातामुळे पुंगावकरांना धक्का बसला आहे. ग्रामस्थांनी घटनास्थळी गर्दी केली होती. पोलीसांनी रस्त्यावरील वाहतुक सुरळीत लावून मृतदेह शव विच्छेदनासाठी सोळांकूर ग्रामीण रुग्णालयाकडे पाठविला आहे.  कुलकर्णी  यांच्यामागे पत्नी, दोन मुले, सुना असा परिवार आहे.

संपादन - स्नेहल कदम