कोल्हापूर : करवीर निवासिनी श्री अंबाबाई मंदिरातील (Ambabai Temple) रामाचा पार येथील वडपूजनासाठी महिलांनी सकाळपासूनच गर्दी केली. पूजा करताना लावलेल्या कापूर आणि अगरबत्तीमुळे वडाला गुंडाळलेल्या सुताने पेट घेतला.

आणि क्षणात अगदी पारंपरिक उत्साहात सुरू असलेल्या वटपौर्णिमेच्या (Vat Purnima 2023) सोहळ्यात महिलांमध्ये भीतीचे वातावरण पसरले. अचानक घडलेल्या या प्रकारामुळे महिलांची तारांबळ उडाली.

याबाबत अधिक माहिती अशी, अंबाबाई मंदिरातील रामाचा पार येथील वडपूजनासाठी सुवासिनींनी सकाळपासूनच गर्दी केली होती. वडपुजनासाठी महिलांच्या रांगा लागल्या होत्या. पूजा करताना महिलांनी वडाच्या बुंध्याच्या ठिकाणीच कापूर पेटवला. बऱ्याच महिलांकडून तेथे कापूर पेटवला गेला.

या कापराची झळ वडाला गुंडाळलेल्या धाग्याला लागली. त्यामुळे धाग्याने पेट घेतला. यानंतर मात्र मंदिर परिसरातील महिलांमध्ये एकच खळबळ उडाली. झाडाला लागलेली आग पाहताच मंदिर परिसरातील यंत्रणा सतर्क होत आग विझविण्यासाठी धावली. घटनेचे गांभीर्य ओळखून पूजन करत असलेल्या महिलांना तत्काळ तेथून खाली उतरवले.

या कर्मचाऱ्यांनी अग्निरोधक मशीनच्या सहाय्याने ही आग आटोक्यात आणली. त्यामुळे अंबाबाई मंदिर परिसरातील मोठा अनर्थ टळला. त्यानंतर मात्र कापूर आणि उदबत्ती इतर ठिकाणी लावण्याच्या सूचना देवस्थान समिती प्रशासनाकडून महिलांना देण्यात आल्या.