कोल्हापूर : पुणे पदवीधर मतदार संघासाठी निवडणूक लढवावी, असा आपला विचार नाही. यापुढेही नसणार आहे. छुप्या चर्चा करण्याची आपल्याला गरज नाही. ज्यावेळी, पदवीधरसाठी उमेदवार म्हणून इच्छुक असेल त्यावेळी, आपली भूमिका उघडपणे जाहीर केली जाईल. भाजप हा पक्ष लोकशाहीच्या मुल्यांवर चालणार पक्ष आहे. त्यामुळे, पक्षश्रेष्ठींनाही माझी भूमिका सांगेन, पण सध्या पुणे पदवीधरमधून निवडणूक लढविणार नसल्याचे कोल्हापूर जिल्हा परिषदेच्या माजी अध्यक्षा शौमिका महाडिक यांनी सांगितले. 

जिल्हा परिषदेमध्ये महाडिक यांनी केलेल्या कामाचे सोशल मीडियावरून कौतुक होत आहे. धाडसी निर्णय घेवून जिल्हा परिषदेचा कारभार कसा करावा, हेही त्यांनी दाखवून दिले. त्यामुळे सोशल मीडियाच्या माध्यमातून महाडिक यांना पदवीधर मतदार संघाच्या उमेदवारीसाठी शुभेच्छा दिल्या जात आहे. या पार्श्‍वभूमीवर त्यांच्याशी संवाद साधला असता महाडिक म्हणाल्या, पुणे पदवीधर मतदार संघाच्या निवडणुका होत आहेत. पदवीधरांच्या प्रश्‍नांची जाण असलेल्या नेत्यांनी या मतदार संघाचे नेतृत्व करावे, हे सर्वांच अपेक्षीत आहे. भाजपचे प्रदेशाध्यक्ष चंद्रकांतदादा पाटील यांनी अतिशय उत्कृष्टपणे या मतदार संघाचे नेतृत्व केले आहे. त्यामुळे असे दिग्गज आणि अनेक उमेदवार यासाठी सध्या इच्छुक आहेत. मला उमेदवारी मिळावी असे वाटणाऱ्यांचा मी आदर करते. पण सध्याच्या निवडणुकीसाठी मी इच्छुक नाही आणि नसणार आहे.

हे पण वाचा - तरुणीने पंचगंगेत उडी मारताच घाबरलेल्या प्रियकराने क्षणाचाही विचार न करता थेट पाण्यात घेतली उडी 

पक्ष जो उमेदवार देणार आहे, त्या उमेदवाराला निवडूण आणण्यासाठी आम्ही सर्व ते परिश्रम घेण्यास सज्ज आहोत. त्यामुळे या मतदार संघातून मला उमेदवारी हवी असेल तर मी जाहीर पणे सांगू शकते. पण सध्या तो विचार नसल्याचेही महाडिक यांनी सांगितले.
संपादन - धनाजी सुर्वे