हुपरी : भाजपतर्फे माजी मंत्री सदाभाऊ खोत यांच्या नेतृत्वाखाली येथील महावितरण कार्यालयावर विविध मागण्यांसाठी मोर्चा काढून ठिय्या आंदोलन केले. महावितरण हुपरी विभागाचे कार्यकारी अभियंता कसबेकर यांनी मागण्यांची पूर्तता करण्याचे लेखी आश्वासन दिल्यानंतर आंदोलन मागे घेतले. 

हुपरीसह परिसरातील रेंदाळ, यळगूड, रांगोळी, तळंदगे, जंगमवाडी, पट्टणकोडोली इंगळी आदी गावातील भाजपचे कार्यकर्ते रांगोळी येथे एकत्र आले. तेथून मोर्चाने येथे येत महावितरण कार्यालयासमोर ठिय्या मारला. जोरदार घोषणाबाजी केली. सदाभाऊ खोत, जिल्हा परिषद सदस्य अशोकराव माने आदींनी विना मीटर जोडणी आहे तेथे जोडभार तपासून बिले दुरूस्त करावीत, मीटर सुरू आहेत तेथे प्रत्यक्ष जागेवर जाऊन रिडींग घेऊन बिले दुरूस्त करावीत, मीटर बंद आहेत तेथे मागील वापराची सरासरी काढून बिले आकारावीत, मीटर पूर्ण बंद असलेल्या ठिकाणी फिडरवरून दिलेली वीज व फिडरवरील खरा जोडभार या आधारे सरासरी वीज वापरानुसार बिले निश्‍चित करावीत, थकीत बिलावरील व्याज व दंडाची रक्कम विनाअट रद्द करावी, वीज वसुलीसाठी साखर कारखाना, पतसंस्था, सोसायटी, ग्रामपंचायत यांना फ्रंचायजी देण्याची योजना महावितरणने राबवू नये आदी मागण्यांचे निवेदन अधिकारी कसबेकर यांना दिले.

कसबेकर यांनी वीज कनेक्‍शन तोडणार नाही तसेच ज्या घरगुती ग्राहकाचे वीज बिल चुकीचे आहे त्यांचे दुरूस्त करून हप्त्याने भरून घेतले जाईल, असे लेखी पत्र दिले. त्यानंतर आंदोलन मागे घेतले. 
आंदोलनात नगरसेवक रफिक मुल्ला, रेंदाळचे सरपंच विजय माळी, वीरकुमार शेंडुरे, सुभाष कागले, डॉ. सुभाष मधाळे, प्रकाश पाटील, डॉ. सचिन मेथे, लक्ष्मण चनगुंडी, पप्पू मगदूम, श्रुतिक पाटील, प्रवीण रांगोळे, अमित एकांडे, आकाश राणे आदींनी भाग घेतला. पोलिस निरीक्षक राजेंद्र मस्के यांच्या मार्गदर्शनाखाली पोलिस बंदोबस्त होता. 

संपादन - सचिन चराटी

kolhapur