कोल्हापूर : कळंबा मध्यवर्ती कारागृहात फेकलेल्या १० मोबाईलसह गांजा प्रकरणाचा छडा लावण्यात स्थानिक गुन्हे अन्वेषण शाखेला यश आले. चौघांनी हे कृत्य केले असून, यात दोघा पैलवानांचाही सहभाग असल्याची माहिती पुढे आली. त्यातील एका संशयित पैलवानास ताब्यात घेण्यात आले. त्याचबरोबर मोटारही जप्त केल्याची माहिती जिल्हा पोलिस अधीक्षक शैलेश बलकवडे यांनी येथे  दिली. 

गुन्हा दाखल झालेल्यांमध्ये भीष्म्या ऊर्फ भीमा सुभेदार चव्हाण (रा. रांजणी, ता. कवठेमहांकाळ, सांगली), राजेंद्र ऊर्फ दाद्या धुमाळ (रा. जयसिंगपूर), ऋषिकेश सदाशिव पाटील (वय २५, रा. कोदवडे, राधानगरी), जयपाल किसन वाघमोडे (रा. वडीये रायबाग, ता. कडेगाव, सांगली) अशी आहेत. 

हेही वाचा - राज्य सरोवर संवर्धन योजना कुचकामी ; 18 प्रस्ताव दाखल; चार प्रकल्पांना केवळ 1 कोटी -

कळंबा कारागृहात एका मोटारीतून आलेल्या संशयितांनी २२ डिसेंबरला मध्यरात्री संरक्षण भिंतीवरून फडक्‍यात बांधलेली तीन पुडकी फेकली. त्यात १० मोबाईल, पाऊण किलो गांजा, दोन पेन ड्राईव्ह मिळून आले. एकाचवेळी कारागृहात १० मोबाईल सापडल्याने कारागृह प्रशासनातही खळबळ उडाली. याप्रकरणी जुना राजवाडा पोलिस ठाण्यात गुन्हा दाखल झाला होता. 

संशयित धुमाळचे कृत्य

संशयित भीष्म्या चव्हाण, राजेंद्र धुमाळ २२ डिसेंबरला मध्यरात्री सव्वाच्या सुमारास आलिशान मोटारीतून कोल्हापुरात आले. त्यांनी गंगावेस परिसरातून ऋषिकेश पाटील व जयपाल वाघमोडेला सोबत घेतले. ते सर्व मोटारीतून कळंबा कारागृहासमोरील रस्त्यावरील तट क्रमांक एकच्या संरक्षण भिंतीजवळ थांबले. येथे धुमाळ मोटारीतून खाली उतरला. त्यानेच कारागृहात मोबाईल, गांजा, चार्जर, पेन ड्राईव्ह फेकल्याची माहिती तपासात पुढे आली. 

संशयित खंडेलवालशी संबध...

संशयित ऋषिकेश व जयपाल पैलवानकीसाठी कोल्हापुरात आले होते. ते काही वर्षांपासून एकत्र राहात होते. ऋषिकेशची दीड वर्षापासून संशयित चव्हाण, धुमाळची ओळख झाली. चव्हाण रेकॉर्डवरील गुन्हेगार आहे. त्याच्यासह ऋषिकेश सध्या कळंबा कारागृहात मोकाअंतर्गत गुन्ह्यातील संशयित विकास खंडेलवाल याच्या संपर्कात होता, अशी माहिती तपासात पुढे आल्याचे पोलिस अधीक्षक बलकवडे यांनी सांगितले. 

हेही वाचा -  केंद्र सरकारने शेतकऱ्यांना  समजून घ्यावे ; श्रीमंत शाहू महाराज -

"या प्रकरणात कारागृहाच्या आतील कोणाचातरी सहभाग असावा, असा संशय बळावला आहे. त्या अनुषंगानेही तपास सुरू असून, लवकरच याची पाळेमुळे खणून काढू."

- शैलेश बलकवडे, जिल्हा पोलिस अधीक्षक

संपादन - स्नेहल कदम