चंदगड : चंदगड- दोडामार्ग मार्गावर कोदाळी (ता. चंदगड) येथे पोलिसांनी कारवाई करून 64 हजार 320 रुपयांची गोवा बनावटीची दारू जप्त केली. वाहन आणि दारू मिळून दोन लाख 64 हजार 320 रुपयांचा मुद्देमाल जप्त केला. कोदाळीनजीक लष्कर पॉईंट येथे काल सायंकाळी पावणेपाचच्या सुमारास पोलिसांनी ही कारवाई केली. सर्व संशयित सांगली जिल्ह्यातील जत तालुक्‍यातील आहेत. 

गोव्याहून एका टॅक्‍स मधून (केए 36 एएम 3736) गोवा बनावटीची दारू बेकायदेशीरपणे आणली जात असल्याची माहिती येथील पोलिसांना मिळाली. त्यानुसार कोदाळी येथे पोलिसांनी सापळा रचला. सायंकाळी पावणेपाचच्या सुमारास ही गाडी चंदगडच्या हद्दीत येताच पोलिसांनी रोखली. त्यांच्याकडे काजू फेणीसह विदेशी कंपनीची दारू सापडली.

संशयित दिलीप कृष्णा कांबळे (अंकलगी, जत, जि. सांगली), संतोष परसराम कांबळे, सचिन वंदना कांबळे, राजेंद्र परसराम कांबळे (तिघेही संक, जि. सांगली) व अजित कांबळे (आसंगी, जि. सांगली) या संशयीतांवर येथील पोलिसांत गुन्हा नोंद झाला आहे. हवालदार महेश बांबळे तपास करीत आहेत. 

संपादन - सचिन चराटी

kolhapur