कोल्हापूर : कोकेन विक्रीप्रकरणी (Cocaine Sale Case) स्थानिक गुन्हे अन्वेषण शाखेने जुना बुधवार पेठेतील नीलेश जाधव याला अटक करून २० लाखांचा माल जप्त केला होता. त्याने हे कोकेन मुंबईतून आणल्याची माहिती समोर आल्याने पोलिसांच्या पथकाने शनिवारी (ता. १२) मुंबईत जाऊन विशाल विलास तांबडे (रा. ग्रँट रोड, मुंबई, मूळ रा. रायगड कॉलनी, पाचगाव) याला अटक केली.

त्याला कोल्हापुरात (Kolhapur) आणल्यानंतर केलेल्या चौकशीत त्याने हे कोकेन हैदराबाद येथून आणल्याची कबुली दिली आहे. त्यामुळ कोकेन कनेक्शनचा तपास आता मुंबईमार्गे हैदराबाद असा होणार आहे. मुंबईत शेअर मार्केटचा व्यवसाय करणारा संशयित तांबडे मूळचा कोल्हापूरचाच आहे. त्याची नीलेश जाधव सोबत ओळख होती. जाधव यानेही शेअर मार्केटमध्ये नशीब आजमावले होते; परंतु तो यामध्ये तोट्यात गेल्याने कर्जबाजारी झाला होता. यामुळे त्याने अमली पदार्थांतून पैसे कमावण्यासाठी तांबडेकडून कोकेन घेतल्याचे तपासात पुढे आले.

संशयित तांबडे याचाही शेअर मार्केटमध्ये तीन ते चार कोटींच्या घरात तोटा झाला आहे. तो हॉटेल व्यवसायात नशीब आजमावण्याचा प्रयत्न करीत होता. मात्र, त्यासाठी त्याच्याकडे पुरेशी रक्कम नव्हती. कोकेनसारख्या अमली पदार्थाची विक्री करून त्याने पैसा पुन्हा उभा करण्यासाठी हा मार्ग अवलंबला. त्यानेही त्याच्या दुसऱ्या एका मित्राकडून हे कोकेन घेतल्याची प्राथमिक माहिती आहे.

तांबडेने घेतेलेले कोकेन हैदराबादहून आल्याचे समजते. हैदराबाद येथील त्याच्या पुरवठादाराच्या शोधासाठीही पोलिसांचे पथक रवाना करण्यात आले आहे. त्यानंतर या रॅकेटचा पर्दाफाश होण्याची शक्यता आहे. दरम्यान, जाधव व तांबडे या दोघांनाही न्यायालयाने १४ ऑक्टोबरपर्यंत पोलिस कोठडी सुनावली असून, त्यांच्याकडून अधिक माहिती घेण्याचे काम सुरू आहे.