कोल्हापूर : अकरावीत शिकणाऱ्या (College Student) आर्यन राजेंद्र पाटील (वय १६, रा. बळवंतनगर, पाचगाव, ता. करवीर) याने नैराश्यातून आत्महत्या केली. शाहू नाका परिसरातील एका अर्धवट बांधलेल्या इमारतीवरून त्याने उडी मारली.

त्याला सीपीआरमध्ये (CPR) उपचारासाठी दाखल केले, मात्र उपचारापूर्वीच त्याचा मृत्यू झाला. याबाबत पोलिसांनी दिलेल्या माहितीनुसार, आर्यनचे वडील शिवाजी विद्यापीठात नोकरी करतात. आर्यनला गेल्या तीन-चार महिन्यांपासून मानसिक नैराश्य जाणवत होते. त्यासाठी तो उपचारही घेत होता.

काल संध्याकाळी तो मित्रांसोबत खेळण्यासाठी बाहेर पडला. शाहू नाका येथील एका क्रीडांगणावर तो खेळत होता. तेथून तो घरी जातो असे सांगून तो निघाला, मात्र रात्री उशिरापर्यंत घरी न आल्याने कुटुंबीयांनी शोध घेतला. यावेळी तो शाहू नाका परिसरातील एका अर्धवट बांधलेल्या इमारतीजवळ पडला होता.

आपण स्वतः उडी मारल्याचे त्याने वडिलांना सांगितले. त्यानंतर त्याला एका खासगी रुग्णालयात दाखल केले. तेथून उपचारासाठी सीपीआरमध्ये आणले, मात्र उपचारापूर्वीच त्याचा मृत्यू झाला. शवविच्छेदनानंतर त्याचा मृतदेह नातेवाईकांच्या ताब्यात देण्यात आला. आर्यनच्या मागे आई, वडील, बहिण असा परिवार आहे.

कोणत्याही गोष्टींमध्ये येणारे अपयश पचवता आले नाही की नैराश्य येते. यासाठी तरुण-तरुणींनी सांघिक मैदानी खेळ खेळले पाहिजेत. त्यातून पराभवही पचवता येतो. पालकांनी मुलांशी मुक्तपणे संवाद केला पाहिजे. मित्र-नातेवाईक यांच्यामध्ये मुलांनी मिसळले पाहिजे. त्यातून एकटेपणा जाणवत नाही.

-डॉ. आश्विन शहा, मानसोपचार तज्ज्ञ