इस्लामपूर : राज्य मार्ग परिवहन महामंडळाकडे चालकाची नियुक्ती नसताना, बॅच बिल्ला नसताना, जड वाहन चालक म्हणून अनुप्राप्ती नसताना तसेच कोणताही अनुभव नसताना राष्ट्रवादीचे प्रदेशाध्यक्ष, आमदार जयंत पाटील यांनी इस्लामपूर शहरातून एसटी बस चालवल्याप्रकरणी त्यांच्यावर गुन्हा दाखल करावा, अशी मागणी आज येथे भाजप पदाधिकारी, कार्यकर्त्यांनी पोलिसांकडे केली. पोलिस निरीक्षक शशिकांत चव्हाण यांना निवेदन दिले. पोलिसांनी तत्काळ कारवाई करावी, या भाजपच्या कार्यकर्त्यांच्या आग्रहाला जुमानले नाही. उद्याची वेळ मागून घेत उद्या संध्याकाळपर्यंत कारवाई करण्याचे आश्वासन त्यांनी कार्यकर्त्यांना दिले.

वाळवा तालुका भाजपचे अध्यक्ष धैर्यशील मोरे, वाळवा तालुका भाजप ओबीसी सेलचे अध्यक्ष मधुकर हुबाले, तालुका भाजप युवा मोर्चाचे अध्यक्ष चंद्रकांत पाटील यांनी कार्यकर्त्यांच्यासमवेत आज इस्लामपूर पोलिसात धाव घेतली. १५ ऑगस्टला आमदार जयंत पाटील हे तहसील कार्यालय चौकात आले होते. इस्लामपूर आगाराची विठाई बस (क्रमांक एमएच १३ सीयू ८१२२) सजवण्यात आली होती. ही बस पाहून ती चालवण्याचा मोह त्यांना आवरला नाही. काही अंतर त्यांनी बस चालवलीही. याप्रकरणी भाजपच्या कार्यकर्त्यांनी राज्य मार्ग परिवहन महामंडळाकडे बस चालकाची नियुक्ती नसताना, बस चालक म्हणून नियुक्ती होण्यासाठी आवश्यक असणारा आरटीओचा बॅच बिल्ला नसताना तसेच जड वाहन चालक म्हणून अनुप्राप्ती नसताना, कोणताही अनुभव नसताना बेकायदेशीररित्या इस्लामपूर शहरातून जयंत पाटील यांनी बस चालवली.

त्यामुळे त्यांच्यावर कारवाई करण्याची मागणी कार्यकर्त्यांनी निवेदनाद्वारे केली. निवेदनावर धैर्यशील पाटील, भाजप युवा मोर्चा अध्यक्ष सतेज पाटील, चंद्रकांत पाटील यांच्यासह कार्यकर्त्यांच्या सह्या आहेत. यावेळी तालुका युवामोर्चाचे सरचिटणीस संदीप सावंत, जिल्हा भाजप चिटणीस संजय हवलदार, प्रवीण परीट, रामभाऊ शेवाळे, आबा मोरे, अक्षय कोळेकर, अक्षय पाटील, स्वप्नील कोरे, विकास परीट उपस्थित होते.

कायदेशीर बाबी तपासू : चव्हाण

आमदार जयंत पाटील यांच्यावर तत्काळ गुन्हा दाखल करावा, यासाठी भाजप कार्यकर्ते आक्रमक व आग्रही होते. त्यावर पोलिस निरीक्षक शशिकांत चव्हाण म्हणाले, ‘माझ्यावर विश्वास ठेवा आणि मला थोडा वेळ द्या, कायदेशीर बाबी तपासून घेऊन मी पुढील प्रक्रिया करू.’