कोल्हापूर : अल्पवयीन मुलीवर लैंगिक अत्याचार केल्याप्रकरणी तरुणास जिल्हा न्यायालयाने दोषी ठरवले. त्याला दहा वर्षे सक्तमजुरीची आणि ३१ हजार रुपये दंडाची शिक्षा सुनावली. अरविंद महादेव वडर (वय २७) असे त्याचे नाव आहे. सरकारपक्षातर्फे विशेष सरकारी वकील अमिता कुलकर्णी यांनी काम पाहिले.

पीडित अल्पवयीन मुलगी महाविद्यालयात शिकते. तिचे महाविद्यालय सुटण्याच्या वेळी वडर बाहेर थांबायचा. तिच्याशी बोलण्याचा प्रयत्न करायचा. तिला थांबवून तुझ्या घरचे माझ्याशी लग्न करून द्यायला का तयार नाहीत, अशी विचारणा करून मारहाणही करायचा. पीडिता गाडीवर न बसल्यास डिक्कीतील ठेवलेल्या चाकूने धाकही दाखवयचा. त्याने मार्च २०१८ ला पीडितेला जबदस्तीने गाडीवर बसवले. लॉजवर नेऊन तिच्यावर अत्याचार केला. नातेवाइकांनी याबाबतची फिर्याद राजारामपुरी पोलिस ठाण्यात दिली. त्यानुसार अरविंदवर गुन्हा दाखल करण्यात आला.

खटल्याचे कामकाज जादा सह जिल्हा न्यायाधीश व अतिरिक्त सह न्यायाधीश ए. एस. महात्मे यांच्या न्यायालयात सुरू झाले. सरकारपक्षातर्फे विशेष सरकारी वकील अमिता कुलकर्णी यांनी नऊ साक्षीदार तपासले. न्यायालयाने दोन्ही बाजूच्या युक्तीवादानंतर अरविंदला दोषी ठरवले. त्याला कलम ३७६ व लैंगिक अपराधापासून बालकांचे संरक्षण अधिनियमानुसार दहा वर्षे सक्तमजुरीची आणि ३१ हजार रुपये दंडाची शिक्षा सुनावली. सरकार पक्षाला या कामात ॲड. भारत शिंदे, ॲड. महेंद्र चव्हाण, पोलिस नाईक माधवी घोडके, अशोक शिंगे यांचे सहकार्य मिळाले.