कोल्हापूर : ‘राज्यात दलित आणि अल्पसंख्याकांवर अन्याय वाढत आहेत. जातीय द्वेष निर्माण करणाऱ्यांवर कठोर कारवाई करावी, अशी मागणी आपण मुख्यमंत्री एकनाथ शिंदे (Eknath Shinde) यांच्याकडे करणार आहोत. तसेच आगामी लोकसभा निवडणुकीच्या अनुषंगाने राज्यातील दोन आणि विधानसभेच्या १५ जागा मिळाव्यात, अशी मागणीही मुख्यमंत्र्यांकडे करणार असल्याची माहिती पीपल्स रिपब्लिकन पक्षाचे नेते माजी खासदार प्रा. जोगेंद्र कवाडे यांनी पत्रकार परिषदेत बोलताना दिली.

प्रा. कवाडे (Prof. Jogendra Kawade) म्हणाले, ‘कागल तालुक्यातील कसबा सांगाव येथे एका दलित कुटुंबाचे (Dalit Family) घर पाडण्यात आले. मिरज तालुक्यातील बेडग या ठिकाणी डॉ. बाबासाहेब आंबेडकर यांच्या नावाने उभारण्यात आलेली स्वागत कमान पाडण्यात आली. त्यामुळे राज्यात दलित आणि अल्पसंख्याकांवर अन्याय सुरू असून समाजामध्ये जातीय द्वेष निर्माण करणाऱ्यांच्यावर कठोर कारवाई करावी.

सरकारी गायरान जमिनी मागासवर्गीय भूमिहिनांना वाटप करावी.' पत्रकार परिषदेला पीपल्स रिपब्लिकन पक्षाचे पश्चिम महाराष्ट्र अध्यक्ष नंदकुमार गोंधळी, जिल्हा सरचिटणीस विद्याधर कांबळे, महिला जिल्हाध्यक्ष लताताई नागावकर आदी उपस्थित होते.