कोल्हापूर : ‘कोल्हापूर दक्षिणमध्ये तुमची पंधरा हजार मते असतील तर कोल्हापूर उत्तरमध्ये आमची ८० हजार मते आहेत’, अशा शब्दांत खासदार धनंजय महाडिक (Dhananjay Mahadik) यांनी राज्य नियोजन मंडळाचे कार्यकारी अध्यक्ष राजेश क्षीरसागर (Rajesh Kshirsagar) यांना टोला लगावला. ते माध्यमांशी बोलत होते.

‘कोल्हापूर उत्तर विधानसभा मतदारसंघावर भाजपने (BJP) पहिल्यापासूनच दावा केला आहे. पोटनिवडणुकीत आम्ही ही जागा लढवली आहे, ८० हजार मतदान घेतले. क्षीरसागर यांनी घेतलेला मेळावा कोणावर दबाव टाकण्यासाठी असू नये. ते जर दक्षिणमध्ये आमची पंधरा हजार मते आहेत असे म्हणत असतील तर आमची उत्तरमध्ये ८० हजार मते आहेत’, असा इशारा महाडिक यांनी दिला.

‘पश्चिम महाराष्ट्रात एकूण ५८ पैकी आज महायुतीकडे ४१ जागा आहेत. यावेळी ४८ ते ४९ जागा निवडून येतील, या दृष्टीने आमचे प्रयत्न सुरू आहेत. कोल्हापूरमधील दहापैकी चार जागा भाजपने लढवाव्यात, अशी विनंती आम्ही केली. शिवाय महायुती म्हणून जास्तीतजास्त जागा निवडून येतील, असे आमचे प्रयत्न आहेत’, असेही महाडिक यांनी स्पष्ट केले. ‘उपमुख्यमंत्री अजित पवार महायुतीमधून बाहेर पडण्याचा प्रश्नच येत नाही. आगामी विधानसभा निवडणुकीनंतर सत्ता येत असताना अजित पवार यांचा मोठा वाटा असेल’, असा दावाही त्यांनी केला.