कोल्हापूर : ‘भारतीय जनता पक्षातर्फे (BJP) जिल्ह्यातील पाच हजार जणांना अवघ्या एक हजार रुपयांमध्ये अयोध्या दर्शन घडवण्यात येणार आहे. मंगळवारी (ता. १३) रात्री ९.३० वाजता अयोध्येला जाणारी ही विशेष रेल्वे (Railway) कोल्हापुरातून जाणार आहे. अयोध्येला जाण्यासाठी भाजप कार्यालय, जिल्हाध्यक्ष यांच्याकडे नोंदणी करावी,’ असे आवाहन खासदार धनंजय महाडिक (Dhananjay Mahadik) यांनी पत्रकार परिषदेत केले.

खासदार महाडिक म्हणाले, ‘भारतीयांचे श्रद्धास्थान असणाऱ्या प्रभू रामचंद्रांचे मंदिर (Ayodhya Ram Temple) पाचशे वर्षांनंतर साकार होत आहे. त्यामुळे प्रत्येकालाच रामाच्या दर्शनाची ओढ आहे. ही गोष्ट लक्षात घेऊन भारतीय जनता पक्षातर्फे जिल्ह्यातील पाच हजार नागरिकांना अयोध्या दर्शन घडवून आणण्यात येणार आहे. यासाठी मंगळवारी (ता. १३) विशेष रेल्वेचे आयोजन करण्यात आले आहे.

यासाठी नागरिकांना अवघे एक हजार रुपये शुल्क द्यावे लागणार आहे. या हजार रुपयांमध्ये प्रवास, जेवण, राहणे, दर्शन, रेल्वेतील जेवण असा सर्व खर्च करण्यात येणार आहे. यानंतरही फेब्रुवारी आणि मार्चमध्ये आणखी रेल्वेचे आयोजन करण्यात येणार आहे. यासाठी पक्ष कार्यालयात तसेच जिल्हाध्यक्ष, तालुकाध्यक्ष यांच्याकडे नोंदणी करावी. पक्षाचे सरचिटणीस डॉ. सदानंद राजवर्धन यांच्याकडे या उपक्रमाचे नियोजन आहे.’ पत्रकार परिषदेला प्रदेश सचिव महेश जाधव, जिल्हाध्यक्ष विजय जाधव, राहुल देसाई, राजवर्धन निंबाळकर, रुपाराणी निकम, हेमंत अराध्ये, विजयेंद्र माने उपस्थित होते.

देशात १९ कोटी लाभार्थी

महाडिक म्हणाले, ‘अर्थसंकल्पात प्रत्येक घटकाचा विचार केला आहे. शासकीय योजनांचा लाभ आता शेवटच्या घटकापर्यंत पोहचत आहे. भारत विकास संकल्प यात्रेच्या माध्यमातून देशातील १९ कोटी लोकांना अवघ्या दोन महिन्यात शासकीय योजना मिळाल्या आहेत.’

खासदार राहणार गावात

‘भाजपतर्फे गाव चलो अभियान राबवण्यात येणार आहे. यामध्ये खासदार, आमदार आणि पक्षाचे पदाधिकारी जिल्ह्यातील एका गावात २४ तास राहाणार आहेत. तर ग्रामीण भागातील पदाधिकारी शहरात राहणार आहेत. या २४ तासात त्यांनी १८ प्रकारचे उपक्रम राबवायचे आहेत. यातून प्रत्येक घटकाशी संवाद साधता येणार आहे,’ असेही महाडिक यांनी सांगितले. खासदार महाडिक चंदगड तालुक्यातील राजगोळी या गावात जाणार आहेत.