कोल्हापूर : सीपीआरमध्ये सध्या एकाच प्रवेशद्वाराने ये-जा सुरू आहे. कोणतीही दुर्घटना घडली तर आतमध्ये आपत्ती निवारण यंत्रणा आणण्यात अनेक अडचणी आहेत. त्यासाठी सीपीआरला असणारी चारही प्रवेशद्वार उघडण्याची गरज आहे. अंतर्गत वाहतुकीचे मार्गही नीट केले पाहिजेत. पार्किंगची व्यवस्था नियोजनपूर्वक असली पाहीजे. सीपीआर व्यवस्थापनाचे दुर्लक्ष आहे. 

सीपीआरच्या इमारतीला चार प्रवेशद्वार आहेत. यातील एक प्रवेशद्वार न्यायालयाच्या जुन्या इमारतीसमोर आहे तर दुसरे करवीर तहसीलदार कार्यालयाला लागून आहे. तिसरे प्रवेशद्वार शाहू स्मारकच्या बाजूला आहे. चौथे प्रवेशद्वार लक्ष्मीपुरी पोलिस लाईनच्या बाजूला आहे. ही चारही प्रवेशद्वारे सुरू ठेऊन त्याचे नियोजन करण्याची आवश्‍यकता आहे.

हेही वाचा - Kolhapur CPR Fire : जिल्हाधिकाऱ्यांची तत्परता सायकलवरुनच गाठलं सीपीआर 

रुग्णवाहिका, शववाहिका, कैद्यांसाठीची वाहने यांना एक प्रवेशद्वार आरक्षित केले पाहिजे. त्यामुळे उर्वरित तीन प्रवेद्वारांवर वाहतुकीचा ताण येणार नाही. अंतर्गत पार्किंगदेखील अस्ताव्यस्त आहे. अग्निशमन दलाचा टॅंकर सर्वत्र पोहचू शकत नाही. त्यासाठी येथे पार्किंगचे नियोजन करणे गरचेचे आहे. इमारतींच्या लिफ्ट बंद असणे, दिव्यांग व्यक्तींसाठी असणाऱ्या मार्गात अडथळे यामुळे भिषण प्रसंग आलाच तर रुग्णांना तेथून हलवणेही अवघड आहे.
 

मागील दरवाजा उघडा हवा 

छत्रपती प्रमिलाराजे रुग्णालयाला लक्ष्मीपुरी पोलिस लाईनच्या बाजूला एक प्रवेशद्वार आहे. सध्या हे प्रवेशद्वार बंद असून तेथे कोंडाळा ठेवला आहे. हा दरवाजा सुरू केल्यास आपत्‍कालीन परिस्थितीत या दरवाज्याचा उपयोग करून रुग्णांना बाहेर काढता येईल.

हेही वाचा - Kolhapur CPR Fire : फायर ऑडिटकडे कानाडोळा केल्यानेच बसला फटका 

संपादन - स्नेहल कदम