कोल्हापूर : यंदाचा गणेशोत्सव दिमाखात साजरा होत आहे. गणेशमूर्ती सुंदर कशी दिसेल, यावर प्रत्येक भक्तांची इच्छा आहे. त्यामुळे आता विविधरंगी वस्त्रांचा वापर करून कॉस्च्युम डिझाइनर बाप्पाला सजवत आहेत.

गणेशमूर्ती सजीव आणि रेखीव दिसण्यासाठी अनेक मंडळे श्रीगणेशाला धोतर, फेटा, वस्त्रांचा वापर करत आहेत. मंगळवार पेठ कोळेकर तिकटी येथील महाडिक यांची आठवी पिढी प्रथमेश यांच्या रूपाने कुटुंबीय टेलरिंग व्यवसायात आहे. ते सध्या श्री गणेशाला विविधरंगी वस्त्रांच्या माध्यमातून अधिकच सुंदर बनविण्याचे काम करत आहेत. एका गाठीवर श्री गणेशाला धोतर बांधणे ही त्यांची खासियत असून, त्यांच्याकडे पंढरपूरपर्यंतची बुकिंग यंदा आहेत. शहरातील किमान दोनशे मोठ्या व सहाशे छोट्या गणेशमूर्तीवर सध्या कॉस्च्युम करण्याचे काम सुरू आहे. चार वर्षांपासून हा ट्रेंड सुरू झाला असून, त्याला मागणीही मोठी आहे. गणेशोत्सव काळात मंडळाच्या मागणीनुसार दररोज किंवा दोन दिवसआड श्री गणेशाचे धोतर बदण्याचे काम करतात.

छत्रपती शिवाजी महाराज, संत बाळूमामा, श्री स्वामी समर्थ, चिंतामणी, लालबागचा राजा आणि शेकडो रूपातील गणेशमूर्ती सजीव करण्याचा प्रयत्न करत आहेत. त्याच पद्धतीने गणेशोत्सवातील सजीव देखाव्यासाठीही वेशभूषा करण्याचे काम प्रथमेश महाडिक करतात.

कॉस्च्युमचा हा ट्रेंड मुंबई, पेण येथून आता कोल्हापुरातही सुरू झाला आहे. गणेशमूर्तींना पूर्ण गणवेशाची मागणी भक्तांकडून वाढत असल्याने त्या पद्धतीच्या गणेशमूर्ती तयार करत आहोत. त्यामुळे गणेशमूर्ती आकर्षक दिसते व मंडळही विसर्जन करताना तितकीच काळजी घेतली जाते.

- आशिष पाडळकर, मूर्तिकार