Gokul Milk News राज्यातील इतर संघांकडून गाय दुधाला सरासरी २८ रुपये दर दिला जात आहे. त्यामुळे, गाय दुधाला प्रतिलिटर ३३ रुपयांऐवजी ३० रुपये दर द्या. पण ‘गोकुळ’कडून सांगली व सोलापूर जिल्ह्यांतील गाईचे सर्व दूध खरेदी करा, अशी मागणी सांगली व सोलापूर जिल्ह्यांतील दूध संस्था व उत्पादकांनी आज केली. त्यामुळे ‘गोकुळ’कडून सांगली व सोलापूर जिल्ह्यांतील दूध ३० रुपयेप्रमाणे खरेदी केले जाणार आहे.

‘गोकुळ’ च्या ताराबाई पार्क येथील कार्यालयात ‘गोकुळ’चे पदाधिकारी आणि दूध संस्थांच्या पदाधिकाऱ्यांची बैठक झाली. बनाळी (ता. जत, सांगली) येथील जोतिर्लिंग सहकारी संस्थेचे संजय पाटील म्हणाले, ‘इतर संघांकडून अपेक्षित दर मिळत नाही. याशिवाय, दररोजचे दोन ते तीन वेळचे दूध स्वीकारतीलच याची खात्री नाही. त्यामुळे, गोकुळने सांगली, सोलापूरसह इतर जिल्ह्यांतील गाईचे दूध प्रतिलिटर तीन रुपये कमी करुन स्वीकारावे.

मंगळवेढा गुंजेगाव येथील विजया दूध संस्थेचे बाबासाहेब रेड्डी म्हणाले, ‘देशात नावाजलेल्या एका मोठ्या दूध संघासह राज्यातील इतर संघांकडून पाईप गळतीसह इतर कारणे सांगून दोन ते तीन वेळेचे दूध अचानकपणे स्वीकारत नाहीत. अशावेळेला हजारो लिटर दूध द्यायचे कोणाला, असा प्रश्‍न पडत आहे. हे नुकसान शेतकऱ्यांना परवडणारे नाही. त्यामुळे गोकुळने सोलापूर आणि सांगलीमधील गाय दूध प्रतिलिटर ३३ ऐवजी ३० रुपयांप्रमाणे खरेदी करावे.

माणगंगा (कडलास, जि. सोलापूर) संस्थेचे शिवाजीराव गायकवाड, संभाजी चौगले (अकोला), अभिजित चव्हाण (कवठेमहांकाळ) यांनी ‘गोकुळ’चा कारभार पारदर्शी असून येथील फॅट, एसएनएफ, वजन काटा व्यवस्थित आहे. वेळेत बिले दिली जातात, असे सांगितले. यावेळी गोकुळचे अध्यक्ष अरुण डोंगळे, माजी अध्यक्ष विश्‍वास पाटील, संचालक बाबासाहेब चौगले, शशिकांत पाटील-चुयेकर, बाळासाहेब खाडे, किसन चौगले, बयाजी शेळके उपस्थित होते.

सध्या १ लाख ६८ हजार लिटर दूध पुरवठा
कडलास, अकोला व गुंजेगाव (जि. सोलापूर) व बनाळी आणि कदमवाडी (जि. सांगली) येथून फेब्रुवारी २०२३ मध्ये गोकुळला गाईच्या दुधाचा प्रतिदिन ११ हजार ८०९ लिटर पुरवठा होत होता. सध्या १ लाख ६८ हजार १४ लिटर दूध पुरवठा केला जात आहे. त्यामुळे, मागणीनुसार गोकुळकडून हे सर्व दूध प्रतिलिटर ३ रुपये कमी दराने खरेदी केले जाणार आहे.