कोल्हापूर : महाविकास आघाडीच्या (Mahavikas Aghadi) जागा वाटपावेळी तुम्ही केलेल्या कागल, चंदगडसह पाच जागांच्या मागणीबाबत निश्चितपणे चर्चा करणार आहे. या पाचही मतदारसंघांतील कार्यकर्त्यांनी कामाला लागावे, असे आवाहन राष्ट्रवादी काँग्रेस शरदचंद्र पवार पक्षाचे प्रदेशाध्यक्ष जयंत पाटील (Jayant Patil) यांनी येथे केले.

येथील विमानतळावरून सांगलीकडे जात असताना त्यांनी उजळाईवाडीमध्ये आयोजित पक्षाच्या प्रमुख कार्यकर्त्यांच्या बैठकीत ते बोलत होते. यात जिल्ह्यातील दहापैकी पारंपरिक तीन जागा चंदगड, राधानगरी-भुदरगड, कागल या ''राष्ट्रवादी''कडे असल्याने शंभर टक्के या जागा आम्ही लढवणार आहे.

याबरोबरच लोकसभा निवडणुकीत झालेल्या तडजोडीमुळे पारंपरिक लोकसभेच्या दोन्ही जागा पक्षास सोडाव्या लागल्या असल्याने विधानसभेच्या निवडणुकीत तरी इचलकरंजी आणि कोल्हापूर उत्तर या दोन जागा तरी महाविकास आघाडीच्या बैठकीत आपल्या पक्षास मिळाव्यात असे प्रयत्न करावेत, अशी मागणी प्रमुख पदाधिकारी व कार्यकर्त्यांनी प्रदेशाध्यक्ष पाटील यांच्याकडे केली आहे. त्यावर महाविकास आघाडीच्या जागा वाटपाच्या बैठकीत यावर चर्चा केली जाईल, अशी ग्वाही प्रदेशाध्यक्ष पाटील यांनी दिली.

कार्याध्यक्ष अनिल घाटगे, रावसाहेब भिलवडे, माजी आमदार राजीव आवळे, महिला यावेळी जिल्हाध्यक्ष अश्विनीदेवी माने, शहराध्यक्ष पद्मजा तिवले, युवक अध्यक्ष रोहित पाटील, इचलकरंजीचे मदन कारंडे, गडहिंग्लजचे अमरसिंह चव्हाण, शिवाजी खोत उपस्थित होते. जिल्हाध्यक्ष व्ही. बी. पाटील यांनी प्रास्ताविक केले. शहराध्यक्ष आर. के. पोवार यांनी आभार मानले.

‘पक्षाने दिलेल्या उमेदवाराच्या पाठीशी राहा’

पक्ष देईल त्या उमेदवाराच्या पाठीमागे खंबीरपणे उभे राहून उमेदवार निवडून येण्याच्या दृष्टिकोनातून जीवाचे रान करा. तिकीट मागायचा अधिकार हा प्रत्येकाला आहे; परंतु पक्ष एकाच उमेदवाराला तिकीट देणार असल्याने उर्वरित इच्छुकांनी पक्षाने दिलेल्या उमेदवाराच्या पाठीशी उभे राहायचे आहे, असे प्रदेशाध्यक्ष पाटील यांनी सांगितले.