राशिवडे बुद्रुक : दाजीपूर अभयारण्य आणि या अभयारण्यात लपलेल्या विविध पर्यटन ठिकाणाचा खजिना कोल्हापूरात येणाऱ्या पर्यटकांसह परिसरातील जनतेला खुला व्हावा. अभयारण्याची ओळख जनसामान्यांना व्हावी आणि पर्यटनाच्या कक्षा रुंदाव्यात या दृष्टीने सोमवार ( ता. ३०) पासून कोल्हापूर- दाजीपुर ही स्पेशल बस सेवा सुरू होत आहे.

जिल्हा नियोजन मंडळाच्या माध्यमातून आणि वन्यजीव विभागाच्या नियोजनातून रोज एक फेरी आणि 15 प्रवासी अशी ही पर्यटन सेवा सुरू होत आहे. उद्या सोमवारी ( ता. 30) सकाळी 09.00 वाजता कोल्हापूर येथील वनविभागाच्या मुख्य कार्यालयाच्या आवारात राधानगरी अभयारण्य पर्यटन वाढविण्याच्या हेतूने या बस सफारीचे उद्घाटन माननीय पालकमंत्री सतेज पाटील यांच्या हस्ते व आमदार प्रकाश आबीटकर यांच्या उपस्थितीत होत आहे.

राधानगरी अभयारण्य हे जागतिक वारसा स्थळ असून तेथील पर्यटनाला चालना मिळावी म्हणून, पालकमंत्री यांनी पुढाकार घेऊन जिल्हा वार्षिक नियोजन आराखड्यात यासाठी तरतूद केली. कोल्हापूर वन्यजीव विभागाने 15+2 सीटर बस विकत घेतली असून, ही बस दररोज कोल्हापूर ते राधानगरी- दाजीपूर पर्यटन करीता सुरू करण्यात येत आहे. एका पर्यटकांस नाममात्र 300 रुपये फीमध्ये दिवसभर जंगल सफारीचा आनंद लुटता येणार आहे.

राधानगरी अभयारण्यात हत्तीमहाल, बटरफ्लाय पार्क, राऊतवाडी धबधबा, माळवाडी बोटिंग व दाजीपूर गवा सफारी या सर्व ठिकाणांना भेट देत येणार आहे. आठवड्यातून एक दिवस या बसमधून शासनातर्फे अनाथ, दिव्यांग व्यक्ती, विद्यार्थी याना सुद्धा मोफत जंगल सफारी करता येणार आहे.

"पर्यटनाच्या नकाशावर राधानगरी अभयारण्याचे महत्व अधोरेखित होण्यासाठी ही सेवा सुरु करीत आहोत. तीन महिन्यापूर्वीच ही बस सेवेत दाखल झाली आहे; मात्र कोरोनामुळे की सुरू केली नव्हती. उद्या याचे अधिकृत उद्घाटन होणार आहे. ही बस सीबीएस स्थानकावरून सकाळी आठ वाजता सुटेल. सध्यातरी स्पॉटवर किंवा वन्यजीव कार्यालयात याची बुकिंग असेल. भविष्यात ऑनलाईन बुकिंगची सेवा सुरू करीत आहोत."-विशाल माळी विभागीय अधिकारी (वन्यजीव)