कोल्हापूर - सरपंच पदाची आरक्षण सोडत काढताना रोटेशन पध्दतीचा अवलंब न केल्याची तक्रार थेट उच्च न्यायालयात झाल्यानंतर न्यायालयाने जिल्ह्यातील सहा गावांतील सरपंच निवडीला स्थगिती दिली आहे. या पार्श्‍वभूमीवर ही सहा गांवे असलेल्या करवीर, शिरोळ, पन्हाळा व भुदरगड तालुक्‍यातील सर्वच ग्रामपंचायतीच्या सरपंच, उपसरपंच निवडीला 16 फेब्रुवारीपर्यंत स्थगिती देण्याचे आदेश जिल्हाधिकारी दौलत देसाई यांनी काढले. 

दरम्यान, या चार तालुक्‍या व्यतिरिक्त शाहुवाडी, राधानगरी, हातकणंगले, कागल, गगनबावडा, आजरा, गडहिंग्लज व चंदगड तालुक्‍यातील नुकत्याच निवडणूक झालेल्या ग्रामपंचायतीतील सरपंच, उपसरपंच पदाच्या निवडी ठरल्याप्रमाणे 9 फेब्रुवारी रोजी होणार आहेत. 

जिल्ह्यातील 433 ग्रामपंचायतीच्या निवडणुका नुकत्याच झाल्या. या ग्रामपंचायतीच्या सदस्यांच्या पहिल्या सभेत सरपंच, उपसरपंच निवडीचा कार्यक्रमही जाहीर झाला होता. त्यानुसार 9 फेब्रुवारी रोजी या निवडी होणार आहेत. तथापि पन्हाळा तालुक्‍यातील उंड्री, करवीर तालुक्‍यातील कोगे व खुपीरे, शिरोळ तालुक्‍यातील मजरेवाडी व शिरटी तर भुदरगड तालुक्‍यातील फणसवाडी या सहा गावातील सरपंच पदाच्या आरक्षणाबाबत उच्च न्यायालयात याचिका दाखल करण्यात आली होती. या याचिकेवरील निर्णय देताना उच्च न्यायालयाने यासंदर्भातील सुनावणी 9 फेब्रुवारी रोजी जिल्हाधिकारी यांनी घेण्याचे आदेश दिले होते. त्याचबरोबर 8 ते 11 फेब्रुवारी दरम्यान होणाऱ्या सरपंच, उपसरपंच पदाच्या निवडीला 16 फेब्रुवारीपर्यंत स्थगिती दिली आहे. 

हे पण वाचा - नातीच्या वयाच्या मुलीवर केला अत्याचार ; न्यायालयाने ठोठावली जन्मठेप

सरपंच पदाचे आरक्षण महाराष्ट्र ग्रामपंचायत अधिनियम 1958 मधील कलम 30(5) व मुंबई ग्रामपंचायत निवडणूक अधिनियम 1964 मधील तरतुदीनुसार तालुकानिहाय काढण्यात आले असल्याने उच्च न्यायालयाच्या आदेशानुसार शिरोळ, करवीर, पन्हाळा व भुदरगड तालुक्‍यातील 9 फेब्रुवारी रोजी होणाऱ्या सरपंच, उपसरपंच निवडीला 16 फेब्रुवारीपर्यंत स्थगिती देत असल्याचे जिल्हाधिकारी देसाई यांनी यासंदर्भात काढलेल्या आदेशात म्हटले आहे. या व्यतिरिक्त उर्वरित आठ तालुक्‍यातील सरपंच, उपसरपंच पदाच्या निवडी 9 फेब्रुवारी रोजी घेऊन त्याचा अहवाल 10 फेब्रुवारीपर्यंत जिल्हाधिकारी कार्यालयाकडे पाठवावा असेही या आदेशात म्हटले आहे. 

संपादन - धनाजी सुर्वे