कोल्हापूर : ‘मी अजूनही दोन टर्म येथेच आमदार होणार आहे. तालुक्यातील जनतेची सेवा करायची आहे’, असा मनोदय पालकमंत्री हसन मुश्रीफ (Hasan Mushrif) यांनी पत्रकारांनी विचारलेल्या खासदार होणार का? या प्रश्नावर बोलताना व्यक्त केला.

दरम्यान, पत्रकारांनी पहिल्यांदा तुम्ही एकच टर्म आमदार होणार, असे सांगितले होते, याची आठवण करून देताच त्यांनी हसत हसतच पत्रकारांना हात जोडले. महायुतीतील मंत्रिपदावरच खूश असल्याचे त्यांनी सांगितले.

इंडिया आघाडीच्या आंदोलनाबाबत मुश्रीफ म्हणाले, ‘मला दिल्लीतील घडामोडींची फारशी माहिती नसते. सकाळी लोक माझ्याकडे विविध समस्या घेऊन येतात, त्यांच्याशी संवाद साधतो. त्यामुळे दिल्लीत काय झाले, हे सकाळच्यावेळी समजून घेऊ शकत नाही. मराठा समाजाला आरक्षण देण्यास शासन सकारात्मक आहे. त्यासाठी ओबीसी आरक्षणाला धक्का लागू नये, याची काळजी शासन घेत आहे.

त्याचाच भाग म्हणून जरांगे-पाटील यांच्या उपोषणानंतर राज्यातील अनेक मराठा कुटुंबांना कुणबी दाखले मिळाले आहेत. त्यामुळे जरांगे व मंत्री भुजबळ यांनी हा मुद्दा जास्त लावून धरू नये.’ दरम्यान, जितेंद्र आव्हाड यांनी भाजप लोकसभेच्या सर्व जागा लढवणार असल्याचे सांगितले आहे. याबाबत मुश्रीफ यांना विचारले असता ते म्हणाले,‘ शिंदे गट, राष्‍ट्रवादी कॉंग्रेस, भाजप यांच्यात भांडण लावण्याचा आव्हाड प्रयत्न करीत आहेत.’

मास्कची सक्ती नाही

‘राज्यात ‘जे एन १’ हा कोरोनाचा नवा व्हेरिएंट आला आहे. त्या पार्श्वभूमीवर राज्यातील सर्व अधिष्ठाता, जिल्हाधिकारी यांची बैठक घेऊन आपापल्या जिल्ह्यात खबरदारी घ्यावी, वैद्यकीय सुविधा सज्ज ठेवावी तसेच औषधसाठा तयार ठेवावा, आदी सूचना दिल्या आहेत. हा खबरदारीचा भाग आहे. मात्र घाबरण्याचे कारण नाही. मास्कची सक्ती केलेली नाही. मात्र ज्यांना आजाराची लक्षणे आहेत, त्यांनी मास्कचा वापर करावा,’ असेही मुश्रीफ यांनी सांगितले.