कोल्हापूर : तुमचे वेगवेगळे फोटो- व्हिडिओ शेअर करण्यास तुम्हाला भाग पाडले जाते. सुरुवातीला हे मनोरंजन वाटते. मात्र, या मोहजालात तुम्ही कसे गुरफटता?, हे तुम्हाला कळत नाही. कालांतराने पुढे तुमचे अश्‍लील फोटो, व्हिडिओ केव्हा शेअर केले? हे सुद्धा कळत नाही. त्यातून तुम्हाला ब्लॅकमेलिंग केले जाते, तुमची फसवणूक होते. ग्रामीण भागातील एका पोलिस ठाण्यात नुकताच अशा पद्धतीचा गुन्हा दाखल झाला आहे. यात काही महिला, मुली सोशल मीडियाच्या जाळ्यात अडकल्याची माहिती पुढे आल्याचे सूत्रांनी सांगितले.

मुलींनी सोशल मीडियाचे अकाउंट काढले. ‘इन्स्टंट’ फोटो शेअर करून ग्रुप वाढवत त्यातून मैत्री वाढवली. अशाच पद्धतीने संबंधित मुलींनी रोज फोटो-व्हिडिओ शेअर केले. मात्र, याच व्हिडिओ आणि फोटोंनी त्यांचा घात केला. ग्रुपमधील इतरांकडून त्यांचा गैरफायदा घेतला.

तुमचे सोशल मीडियावर बिनधास्त वागणे महागात पडते, हेच वागणे ब्लॅकमेलिंग करण्यासाठी महत्त्वाचे ठरते. तुमचे सोशल मीडियावरील सर्व फ्रेंड्स हॅक करून त्यांच्यासमोर तुमची बदनामीची भीती दाखविली जाते. यातून तुम्हाला जे करायचे नाही, ते करण्यास भाग पाडले जाते. चुकीची कृत्ये करण्याची जबरदस्ती केली जाते. सोशल मीडिया अकाउंट फेसबुक, इन्स्टाग्राम, ट्विटर, स्नॅपचॅट वापरत असाल तर फसवणूक होऊ शकते. तुमचे फोटो-व्हिडिओ यांचा वापर करून खंडणी मागितली जाऊ शकते. यातून होणारी फसवणूक जीवावर बेतते.

वाढता सोशल मीडिया सायबर क्राईमसाठी पोषक ठरत आहे. अनेक जण याचे बळी ठरतात. सोशल मीडिया हाताळताना त्याचे पूर्ण ज्ञान घ्या. लॉग इन आणि लॉग आउट करा. पासवर्ड गोपनीय ठेवा. ओटीपी कोणालाही देऊ नका. फसवणूक झाली, तर सायबर सेलकडे तक्रार नोंदवा.

- शशिराज पाटोळे, पोलिस निरीक्षक, सायबर सेल