कोल्हापूर : मराठा आरक्षणप्रश्‍नी खासदार युवराज संभाजीराजे छत्रपती राष्ट्रपती रामनाथ कोविंद यांची दोन सप्टेंबरला भेट घेणार असून, सर्व पक्षांना त्यांचे प्रतिनिधी पाठविण्याचे आवाहन त्यांनी केले आहे.

संभाजीराजे यांनी मराठा आरक्षणाचा विषय राष्ट्रपतींकडे मांडण्यासाठी व समाजाच्या भावना त्यांच्यापर्यंत पोहोचविण्यासाठी राष्ट्रपती भवनकडे पत्रव्यवहार करून राष्ट्रपती रामनाथ कोविंद यांच्या भेटीची वेळ मागितली होती. त्यानुसार राष्ट्रपती रामनाथ कोविंद यांनी २ सप्टेंबरला भेटीची वेळ दिली असल्याची माहिती संभाजीराजे यांनी ट्विटरवर दिली आहे.

राष्ट्रपतींच्या भेटीसाठी महाराष्ट्रातील प्रत्येक पक्षाने त्यांचा एक खासदार प्रतिनिधी पाठवावा. यासाठी सर्व पक्षांच्या प्रमुखांना व गटनेत्यांना पत्र पाठवून आवाहन केल्याची माहिती त्यांनी दिली आहे. दरम्यान, मराठा आरक्षणाच्या दृष्टीने ही भेट अत्यंत महत्त्वाची मानली जात असून, यावेळी महाराष्ट्रातील सर्व पक्ष खासदार संभाजीराजे छत्रपती यांच्यासोबत आपले प्रतिनिधी म्हणून कोणास पाठवतात, याकडे लक्ष लागले आहे.