कोल्हापूर : दुर्गराज रायगडावरील जगदीश्वर मंदिराच्या डाव्या बाजूच्या वाड्यात सुरू असलेल्या उत्खननात गुरुवारी (१) सोन्याची बांगडी सापडली. गडावर इतका मोठा सोन्याचा अलंकार पहिल्यांदाच सापडला आहे. यापूर्वी तुटलेली सोन्याची साखळी सापडली असून, सुबक नक्षीकाम असलेल्या बांगडी‌ने इतिहास संशोधक, अभ्यासक व शिवभक्तांचे लक्ष वेधले आहे. दरम्यान, रायगड विकास प्राधिकरणाचे अध्यक्ष खासदार युवराज संभाजीराजे छत्रपती यांनी गडास भेट देऊन बांगडीसह अन्य वस्तूंची पाहणी करत, पुरातत्त्व विभागाने केलेल्या कामगिरीचे विशेष कौतुक केले.

खासदार संभाजीराजे यांच्या मार्गदर्शनाखाली पुरातत्त्व खात्यातर्फे गडावर उत्खनन सुरू आहे. मूर्ती, नाणी, तोफगोळे, बंदुकीच्या गोळ्या, भांडी, नाणी, घरांची वेगवेगळ्या प्रकारची कौले अशा वस्तू मिळालेल्या आहेत. मात्र, गुरुवारी झालेल्या उत्खननामध्ये सोन्याची बांगडी मिळाली. संभाजीराजे यांनी तत्काळ गडाला भेट देऊन या बांगडीची पाहणी केली. तसेच उत्खननात सापडलेल्या दिव्याची माहिती घेतली.

हेही वाचा - पतीच्या मृत्यूनंतर एकलुत्या एका मुलावर नियतीचा घाला; यशराजची रंगपंचमीची अंघोळ ठरली अखेरची

गडावर बांगडी सापडल्याची बातमी पंचक्रोशीसह इतिहास अभ्यासकांत पसरताच त्यांच्यातील उत्सुकता दाटून आली. याबाबत रायगड विकास प्राधिकरणाचे कॉन्झर्व्हेशन आर्किटेक्ट वरुण भामरे यांच्याशी संपर्क केला असता ते म्हणाले, 'उत्खननामध्ये ही सोन्याची बांगडी मिळाली असून, तिचे वजन केलेले नाही. पुरातत्व खात्याकडून माहिती मिळाल्यावर त्याबाबत अधिक सांगता येईल.'

"उत्खननात मिळालेल्या या वस्तूंमुळे तत्कालीन राहणीमान, संस्कृती, वास्तूरचना नव्याने समजण्यास मदत होणार आहे. गडावर उत्खननास योग्य अशा जवळपास ३५० साईटस् आहेत. याठिकाणी देखील उत्खनन झाल्यानंतर अनेक महत्त्वाच्या गोष्टी उजेडात येतील. सध्या अत्यंत दुर्मिळ असलेले शिवरायांचे 'होन' हे सोन्याचे नाणे देखील आपल्याला उत्खननात निश्चितच मिळेल, असा मला विश्वास आहे."

- खासदार युवराज संभाजीराजे छत्रपती