कोल्हापूर: दुर्गम भागातील नागरिकांना आज किती समस्यांना सामोरे जावे लागते याची प्रचिती आज कोल्हापूर (Kolhapur) जिल्ह्यातील भुदरगड (Bhudargad) तालुक्यात पहावयास मिळाली. या तालुक्यातील एका गर्भवती महिलेला ज्या रस्त्याने धड चालता सुद्धा येत नाही अशा रस्त्यावरून बांबूची डोली करून तिला रुग्णालयात न्यावे लागले.गेली अनेक वर्ष नागरिक या परिस्थितीचा सामना करत असताना शासन मात्र त्याकडे दुर्लक्ष करीत आहे.

भुदरगड तालुक्यात आजही अनेक गावांमध्ये जाण्यासाठी रस्ते नाहीत. इतर वेळी नागरिक पायवाटेने जातात. मात्र पावसाळ्यामध्ये त्यांना अनेक संकटांना तोंड द्यावे लागते.धनगर वाड्यामध्ये एखादा रुग्ण अत्यावस्थ झाला तर त्याला उपचारासाठी दोन किलोमीटर पाय वाटेने घेऊन जावे लागते. आजवासनोली ग्रामपंचायतीच्या जोगेवाडी धनगरवाडा येथील 23 वर्षीय गर्भवती महिलेला उपचारासाठी नेणे अशक्य होते. अत्यावस्थ असलेल्या या महिलेला चालता येत नव्हते. अशा परिस्थितीत नातेवाईक आणि गावकऱ्यांनी बांबूच्या डालीतून घेऊन जाण्याचा निर्णय घेतला. भर पावसात चिखलातून पायवाटेने या महिलेला रुग्णालयात नेण्यात आले.

हेही वाचा- इस्लामपूर नगरपालिकेचे मुख्याधिकारी अरविंद माळी यांची पंढरपूर नगरपालिकेत बदली

गर्भवती असो किंवा इतर आजारी अशा लोकांना पाळणा करूनच पायवाटेने घेऊन जावे लागते. प्रशासनाचे दुर्लक्ष आणि वन खात्याच्या अडचणीमुळे आज अनेक वाड्यातील लोकांना या अडचणींचा सामना करावा लागत आहे. असे गावकर्‍यांचे मत आहे.