कोल्हापूर -  केंद्र सरकारने आणलेले कृषी विधेयक शेतकऱ्यांना देशोधडीला लावणारे आहे. लॉकडाउनच्या काळात काही मंत्र्यांनी घेतलेला चुकीचा निर्णय शेतकऱ्यांवर लादला जात आहे. याविरुद्ध दिल्लीत शेतकरी थंडीत कुडकुडत आहेत. शेतकऱ्यांच्या मागण्या तत्काळ मान्य केल्या पाहिजेत, अन्यथा देशभर वणवा पेटेल, असा इशारा माजी खासदार राजू शेट्टी यांनी दिला. ‘भारत बंद’च्या पार्श्‍वभूमीवर बिंदू चौकात झालेल्या जाहीर सभेत ते बोलत होते.

भांडवलदारांच्या हातचे खेळणे बनलेले मोदी सरकार नेस्तनाबूत करा, असे आवाहन विविध पक्ष, संघटनांच्या ठिय्या आंदोलनावेळी वक्‍त्यांनी केले. यावेळी चले जाव-चले जाव मोदी सरकार चले जावो, अशा जोरदार घोषणा दिल्या. काँग्रेस, राष्ट्रवादी, शिवसेना, स्वाभिमानी शेतकरी संघटना, आरपीआय (गवई गट), शेकाप, लालनिशाण, आम आदमी पक्षासह इतर संघटनांचे कार्यकर्ते व शेतकरी सहभागी झाले. केंद्र सरकारने शेतकऱ्यांच्या मागण्यांचा विचार करावा. आंदोलनाबाबत उलट-सुलट टीकाटिप्पणी केली जात आहे. यामुळे शेतकऱ्यांचा संयम सुटत आहे. त्यामुळे, उद्या होणाऱ्या मंत्रिमंडळाच्या बैठकीत शेतकऱ्यांच्या बाजूचा निर्णय न घेतल्यास आंदोलनाचा इशारा अखिल किसान संघर्ष समितीने दिला.

माजी आमदार संपतराव पवार-पाटील म्हणाले, ‘‘प्रत्येकवेळी शेतकरीच पिचला जात आहे. केंद्र सरकारने केलेले कृषी कायदे शेतकऱ्यांना हानिकारक आहेत.’’

उदय नारकर म्हणाले, ‘‘देशात मोदींची मुजोर सत्ता आहे. बळिराजाला गाढण्याचे सरकार काम करत आहे.’’
जिल्हाध्यक्ष विजय देवणे म्हणाले, ‘‘ज्या-ज्यावेळी या देशात दादागिरी केली जाते. त्या-त्या वेळी त्यांची दादागिरी उतरवण्याचे काम जनतेने केले आहे.’’

अतुल दिघे म्हणाले, ‘‘कामगार कायदे मोडल्यामूळे कामगारांचे नुकसान झाले. त्यांच्या उत्पन्नामध्ये घट झाली आहे. भांडवदारांच्या हातचे खेळणे बनलेले मोदी सरकार नेस्तानाबूत 
केले पाहिजे.’’

सतीशचंद्र कांबळे म्हणाले, ‘‘केंद्र सरकारने केलेले कायदे म्हणजे शेतकऱ्यांसाठी काळा दिवसच आहे.’’

हे पण वाचा - विद्यार्थ्यांच्या अश्रूंनी शिक्षकाची बदली रद्द

शारंगधर देशमुख यांनी मनोगत व्यक्त केले. महापौर निलोफर आजरेकर, राष्ट्रवादीचे आर. के. पोवार, शिवसेना जिल्हाध्यक्ष संजय पवार, प्रा. जनार्दन पाटील, विश्‍वासराव देशमुख, टी. एस. पाटील, अजित पाटील, विक्रम पाटील, गिरीश फोंडे 
उपस्थित होते.

शहा हे इराणी नाव
हैदराबाद, औरंगाबादचे नाव बदलू पाहणाऱ्यांनी अमित शहा यांचे आडनाव बदलावे. कारण शहा हे इराणी नाव आहे. त्यामुळे त्यांचे नाव बदलले पाहिजे, अशी टीका नारकर यांनी केली.

संपादन - धनाजी सुर्वे