कोल्हापूर - आज होणाऱ्या सुनावणीत आरक्षणावरील स्थगिती उठेल असा विश्वास व्यक्त करत सुनावणीसाठी राज्य सरकारची तयारी पूर्ण झाली असून सरकार मराठा समाजाची बाजू भक्कमपणे मांडेल असा विश्वास खासदार संभाजीराजे छत्रपती यांनी व्यक्त केला आहे. 

मराठा आरक्षण प्रकरणी आज दुपारी दोन वाजता सर्वोच्च न्यायालयात पाच न्यायाधीशांच्या घटनापीठासमोर सुनावणी होणार आहे. इतर मागासवर्गीयांच्या आरक्षणाला कोणताही धक्का न लावता मराठा समाजाला आरक्षण दिले जावे, अशी भूमिका महाराष्ट्र राज्यातर्फे न्यायालयात मांडली जाणार आहे. याच पार्श्वभूमिवर खासदार संभाजीराजे आज माध्यमांसोबत बोलत होते. यावेळी त्यांनी ओबीसींचे आरक्षण काढून घेण्याचा संबंधच नसल्याचे सांगत आमचा लढा हा मराठा समाजाला एसईबीसीचे आरक्षण मिळावा यासाठी आहे, अशी भूमिका स्पष्ट केली.  मराठा समाजाच्या मुलांवर अन्याय झाल्याचे मतही यावेळी संभाजीराजे यांवी व्यक्त केले. 

‘एसईबीसी’ प्रवर्गाअंतर्गत मराठा समाजाला देण्यात आलेल्या आरक्षणावर सर्वोच्च न्यायालयाने अंतरिम स्थगिती दिली होती. आरक्षणावर दिली गेलेली स्थगिती उठवण्यासाठी केलेल्या अर्जावर आज सुनावणी होणार आहे. सर्वोच्च न्यायालयाने दिलेल्या स्थगितीमुळे अनेक दिवसांपासून विद्यार्थी प्रवेश प्रक्रिया व नोकर भरती प्रक्रिया रखडली. आता सर्वांचे लक्ष असलेल्या अर्जावर सुनावणी होत आहे. या सुनावणीत ॲड. संदीप देशमुख आणि ज्येष्ठ विधिज्ञ अभिषेक सिंघवी हे बाजू मांडणार आहेत.  

हे पण वाचा - शरद पवार यांच्या प्लसमध्ये जाण्यासाठी मुश्रीफ टीका करतात ; चंद्रकांत पाटील यांचा टोला

संपादन - धनाजी सुर्वे