सांगली : जिल्ह्यात भाजप रुजण्यासाठी संघर्ष करणाऱ्या निष्ठावंत कार्यकर्त्यांनी प्रदेशाध्यक्षांना घेराव घालण्याबरोबरच प्रदेश कार्यालयासमोर धरणे आंदोलन करण्याचा इशारा दिला आहे. जिल्ह्यातील भाजपच्या निष्ठावंत कार्यकर्त्यांची आज सांगलीत बैठक झाली. टिळक स्मारक मंदिरात झालेल्या बैठकीत नाराज कार्यकर्त्यांनी तीव्र भावना व्यक्त केल्या. निष्ठावंत कार्यकर्त्यांनी जिल्ह्यात भाजपचे बीज रोवून रोपटे वाढविले, त्या तळागाळातील कार्यकर्त्यांना सध्या नेते गृहीत धरत नाहीत. प्रदेश नेतृत्व या कार्यकर्त्यांकडे जाणीवपूर्वक दुर्लक्ष करत असल्याचा आरोप यावेळी करण्यात आला.

निष्ठावंत कार्यकर्त्यांची आजची ही तिसरी बैठक होती, तरीही जिल्हा अथवा ‘प्रदेश’च्या पदाधिकाऱ्यांकडून कोणतीही दखल घेतली गेली नाही. त्यामुळे प्रदेश कार्यालयासमोर धरणे आंदोलन करण्याचा निर्णय यावेळी घेण्यात आला. भाजप प्रदेशाध्यक्ष चंद्रशेखर बावनकुळे यांना घेराव घालून निदर्शने करण्याचा इशाराही देण्यात आला. जिल्ह्यात येणाऱ्या ‘प्रदेश’च्या पदाधिकाऱ्यांसह मंत्र्यांनाही काळे झेंडे दाखवण्यात येणार आहेत. त्यापूर्वी शेकडो कार्यकर्त्यांच्या सह्यांचे निवेदन प्रदेश कार्यकारिणीकडे पाठवण्यात येणार आहे. पुन्हा एकदा भारतीय जनसंघाची स्थापना करावी लागेल, असा इशाराही या गटाने दिला. बैठकीस प्रताप पाटील, प्रदीप वाले, डॉ. योगेश लाड, विनायक खरमाटे, अॅड. श्रीपाद आष्टेकर, भारत निकम, संजय हिरेकर, संजय कोरे, भगवान पाटील, सुरेश कोरे उपस्थित होते.