कोल्हापूर : ‘जिल्ह्यातील दोन्ही लोकसभा मतदारसंघातील (Loksabha Election) उमेदवार विजयी करायचे आहेत. दोन्ही उमेदवार शिवसेनेचे असतील,’ यासह इतर सूचना माजी मुख्यमंत्री आणि पक्षप्रमुख उद्धव ठाकरे (Uddhav Thackeray) यांनी उपनेते संजय पवार (Sanjay Pawar) यांना केल्या.

उपनेतेपदी निवड झाल्यानंतर त्यांनी काल (बुधवार) मुंबईत ठाकरे यांची भेट घेतली. यावेळी आगामी लोकसभेच्या निवडणुकीबाबत ठाकरे यांनी या सूचना केल्या. जिल्ह्यातील कोल्हापूर आणि हातकणंगले लोकसभा मतदारसंघात शिवसेनेचे उमेदवार विजयी झाले होते. आपल्यातून ते बाहेर पडले असले तरीही त्या दोन्ही जागांवर महाविकास आघाडीत आपलाच अधिकार आहे.

त्यामुळे दोन्ही मतदारसंघात शिवसेनेचे उमेदवार असतील. आगामी राजकरणासाठी जिल्ह्यातील दोन्ही जागांवर आपले उमेदवार विजयी होणे आवश्‍यक आहे. यासाठी आवश्‍यक ती रणनीती आखणे, उमेदवार विजयी झालेच पाहिजेत यासाठी सर्वच पातळीवर प्रयत्न करणे, तसेच जिल्ह्यातील इतर घडामोडींबाबत ठाकरे यांनी संजय पवार यांच्याशी चर्चा केली.

दरम्यान, जिल्ह्यातील दोन्ही जागांवर शिवसेनेचे उमेदवार विजयी झाले असले तरीही दोघेही सध्या शिंदे गटात गेले आहेत. त्यामुळे त्यांच्या ठिकाणी शिवसेनेचे (ठाकरे गट) नवीन उमेदवार उभा करण्यासह त्यांना विजयी करण्यापर्यंतची तयारी नव्याने ठाकरे गटाला करावी लागणार आहे. पवार हे जिल्हाप्रमुख असताना त्यांना उपनेतेही केले आहे. त्यामुळे त्यांचीही जबाबदारी आता वाढली आहे.