...अन्‌ सरूडमध्ये समर्थकांचा
अंतिम क्षणी काढता पाय
सरुड, ता. ४ : मतमोजणीपूर्वीच महाविकास आघाडीचे उमेदवार सत्यजित पाटील-सरुडकर यांच्या सरुड (ता. शाहूवाडी) येथील शिव-शाहू महाविद्यालयाच्या परिसरातील कार्यालयात ८ पासूनच समर्थकांनी गर्दी करायला सुरुवात केली. विजयाची खात्री घेऊन सायंकाळी ६ पर्यंत समर्थक थांबले होते. पोस्टल मताचा कल सुरुवातीला सरुडकरांच्या बाजूने आल्याने गर्दी जमली.
महाविद्यालयाच्या परीसरात स्वतः सत्यजित पाटील, वडील माजी आमदार बाबासाहेब पाटील, भाऊ युवराज पाटील, विराज नाईक, शिवसेना उपजिल्हा प्रमुख नामदेव गिरी, जि.प. सदस्य विजय बोरगे, आनंदराव भेंडसे व उपस्थित समर्थक तणाव, उत्सुकता, उत्कंठता आणि दबाव यांना फेरीअखेर सामोरे जात मतांची फेरीगणिक आकडेवारी जाणून घेत होते. पहिल्या फेरीत ७७ मतांची आघाडी मिळाल्याने धाकधूक वाढली. १४ व्या फेरीअखेर सरुडकरांचे लीड वाढत गेले तसे समर्थकांचा उत्साह वाढला.
१५ व्या फेरीनंतर धैर्यशील माने यांचे मताधिक्य वाढत गेले. तरीही प्रत्येकाच्या चेहऱ्यावर हुरहूर दिसत होती. एक्झिट पोलनुसार बहुतांशी चॅनल आणि सर्‍व्‍हे एजन्सीने सत्यजित पाटील यांचे नाव जाहीर केले होते. मात्र प्रत्येकाला हुरहूर लागून राहिली होती. शेवटी अंतिम फेरीची आकडेवारी जाहीर होताच समर्थक खिन्न चेहऱ्याने घरी परतले.