कोल्हापूर : शासन आपल्या दारी उपक्रमासाठी (Shasan Aplya Dari Yojana) एसटी महामंडळाने ७१६ बस गाड्यांची सेवा दिली. यात जिल्ह्यातील ३५० बस वापरल्या. उर्वरित बस परजिल्ह्यांतून आणल्या. त्यामुळे अवघ्या दीडशे बसमधून जिल्ह्यातील नेहमीची प्रवासी सेवा देणे मुश्कील झाले. याचा फटका स्थानिक प्रवाशांना बसला.

एसटीच्या जवळपास १५० हून अधिक फेऱ्या रद्द झाल्याने हजारो प्रवाशांचा खोळंबा झाला, तर काहींनी खासगी प्रवासी वाहतुकीचा (ST Corporation) आधार घेतला, तर अनेकांनी आजचा प्रवासच रद्द केला. सांगली, रत्नागिरी, सोलापूर, सिंधुदुर्ग, सातारा येथून प्रत्येकी ५० ते ७० बस मागविल्या होत्या.

त्या काल सकाळी सहापासून विविध गावांतील शासकीय योजनांचे लाभार्थी घेऊन तपोवन मैदानावर आल्या. दुपारी बाराला बस दाखल झाल्या. लाभार्थींना सोडल्यानंतर बस थांबून होत्या. सायंकाळी मुख्यमंत्री एकनाथ शिंदे यांच्या प्रमुख उपस्थितीत सभा झाल्यानंतर बस लाभार्थींना गावी सोडण्यासाठी रवाना झाल्या. या बस रात्री जिल्ह्यातील सर्व तालुक्यांतील महत्त्वाच्या गावांकडे लाभार्थींना घेऊन गेल्या. आज (ता. १४) सकाळी सहापासून नियमित प्रवासी सेवेत दाखल होणार आहेत.

शासन आपल्या दारी उपक्रमासाठी कोल्हापूर, तसेच अन्य जिल्ह्यांतून ३७० बस आणल्या होत्या. सर्व लाभार्थी प्रवाशांना सुरक्षितपणे त्यांच्या गावी सोडले आहे. आजपासून सर्व बस नियमित प्रवासी सेवेत दाखल होतील. जिल्ह्यातील महत्त्वाच्या मार्गांवर प्रवासी वाहतुकीसाठी बस धावल्या आहेत. मात्र कमी प्रवासी प्रतिसाद असलेल्या ठिकाणी काही अंशी गैरसोय होऊ शकते.

- एस. बी. बोगरे, एसटी विभागीय वाहतूक अधिकारी